ڈسٹرکٹ ہیڈ کوارٹر ہسپتال منڈی بہاؤالدین میں 1 منٹ میں 11 ہزار پودے لگائے گئے

خواتین کے عالمی دن کے موقع پر محکمہ جنگلات کے زیر اہتمام ڈسٹرکٹ ہیڈکوارٹر ہسپتال کے لان میں شجرکاری مہم کے حوالے سے تقریب کا انعقاد کیا گیا۔ تقریب کی صدارت ڈپٹی کمشنر شاہد عمران مارتھ اور ڈی پی او رضا صفدر کاظمی نے کی۔ اس موقع پر ایک منٹ میں 11 ہزار پودے لگائے گئے۔

منڈی بہاوالدین ( ایم.بی.ڈین نیوز 08 مارچ 2024) تقریب میں مختلف شعبوں سے تعلق رکھنے والی خواتین جن میں ڈاکٹرز، پولیس، نرسز، طالبات اور وکلاء سمیت دیگر خواتین نے شرکت کی۔ ڈپٹی کمشنر شاہد عمران مارتھ اور ڈی پی او رضا صفدر کاظمی کا تقریب سے خطاب کرتے ہوئے کہنا تھا کہ آج کے دن کو منانے کا مقصد معاشرے میں خواتین کو عزت و احترام دینا اور ان کے حقوق کو تسلیم کرانا ہے۔

اس دن کی مناسبت سے آج ہم نے ضلع منڈی بہاوالدین میں شجرکاری مہم کا آغاز کر دیا ہے۔ تمام سرکاری محکموں کی خواتین کو شجرکاری مہم میں حصہ لینے کیلئے مدعو کیا گیا ہے۔ ان کا مزید کہنا تھا کہ زیادہ سے زیادہ درخت لگانا اور جنگلات کے رقبہ میں اضافہ وقت کی اہم ضرورت ہے۔ دورحاضر میں بڑھتی ہوئی ماحولیاتی آلودگی کے پیش نظر زیادہ سے زیادہ درخت لگا کر ہم وطن عزیز کے ماحول کو ناصرف خوبصورت بناسکتے ہیں بلکہ شجرکاری کے فروغ سے ماحولیاتی آلودگی سے نجات پاسکتے ہیں۔

ڈپٹی کمشنر او ر ڈی پی او نے شجرکاری مہم میں حصہ لینے والے خواتین کو بھر پور انداز میں خراج تحسین پیش کیا۔ بعدازاں ملک و قوم کی سلامتی کیلئے دعا بھی کی گئی۔ ڈی او فاریسٹ نے بتایا کہ شجرکاری مہم ایک ماہ تک جاری رہے گی اور اس دوران ٹارگٹ کے حصول کو ممکن بنایا جائے گا۔