ڈپٹی کمشنر عثمان خالد خان نے کہا ہے کہ حکومتی ایس او پیزکے تحت کم از کم اجرت کے نفاذ، ای او بی آئی رجسٹریشن، انسپکشنز اور سوشل سکیورٹی کارڈز کے اجراء کیلئے ٹھوس اقدامات کئے جائیں، انہوں نے متعلقہ محکموں کے افسران کو باور کرایا کہ لیبر لاز کی خلاف ورزی کے مرتکب افراد کے خلاف قانونی کاروائی کی جائے۔
منڈی بہاوالدین( ایم.بی.ڈین نیوز 07 جون 2022 ) ان خیالات کا اظہار انہوں نے محکمہ لیبر کے زیر اہتمام ڈسٹرکٹ ویجی لینس کمیٹی کے اجلاس کی صدارت کرتے ہوئے کیا۔ اجلاس میں اسسٹنٹ ڈائریکٹر لیبر ثاقب حیات گوندل، اسسٹنٹ لیبر آفیسر رانا آصف منیر ، بھٹہ مزدوروں کے صدرمیاں غلام سرور، جنرل سیکرٹری ، بھٹہ مزدوروں کے نمائندے امتیاز شاہین اور دیگرز نے شرکت کی۔
قبل ازیں اسسٹنٹ ڈائریکٹر لیبر و یلفیئر ثاقب حیات نے اجلاس کو محکمہ لیبر کی کارکردگی کے حوالے سے تفصیلی بریفنگ دیتے ہوئے بتایا کہ محکمہ لیبرکے افسران تسلسل کے ساتھ بھٹہ خشت اور شاپس کی انسپکشن کا عمل جاری رکھے ہوئے ہیں اور چیکنگ کے دوران چائلڈ لیبر پائے جانے پر ایک بھٹہ مالک کے خلاف ایف آئی آر جبکہ 3 دکانداروں کے خلاف 3 ایف آئی آرز درج کرا دی گئی ہیں ۔
انہوں نے اجلاس کو بتایا کہ ضلع بھر میں216 بھٹے رجسٹرڈ کر کے 907 سوشل سکیورٹی کارڈز جاری کر دئیے گئے ہیں ۔جس پرڈپٹی کمشنر نے باقی رہ جانے والے خاندانوں کو جلد از جلد سوشل سیکورٹی کارڈ جاری کرنے کی ہدایت کی۔ انہوں نے کہا کہ تمام صنعتی کارکنان کو سوشل سیکورٹی کارڈ کا اجراء یقینی بنایا جائے تاکہ غریب مزدوروں کی فلاح و بہبود ہو سکے اور یہ علاج معالجہ کی سہولیات سے فائدہ اٹھا سکیں۔
انہوں نے کہا کہ پنشنرز کو بھی ای او بی آئی کارڈز کا عمل جلد سے جلد ممکن بنایا جائے ۔انہوں نے کہا ہے کہ جبری مشقت کے خاتمے کیلئے ہم سب کو مل کر کام کرنا ہو گا، حکومتی ایس او پیز اور لیبر قوانین کے تحت کم از کم اجرت کے نفاذ اور انسپکشن کا عمل جاری رکھا جائے۔
