ڈپٹی کمشنر محمد شاہد نے سستا رمضان بازار ملکوال کا دورہ کیا اور مختلف سٹالز پر جا کر رعائتی نرخوں پر اشیائے خوردونوش کی دستیابی، وزن، معیار اور قیمتوں کو چیک کیا۔ اسسٹنٹ کمشنر ملکوال عثمان غنی اور دیگر افسران بھی ان کے ہمراہ تھے۔
منڈی بہاوالدین ( ایم.بی.ڈین نیوز 26اپریل 2022) ڈپٹی کمشنر نے رمضان بازار میں ایگری کلچر فیئر پرائس شاپس پر سبزیوں جن میں آلو، پیاز، ٹماٹر اور دیگر اشیاء کے معیار کو چیک کیا۔ انہوں نے پھلوں ، چینی، آٹا اور کریانہ کے سٹالز کا بھی معائنہ کیا اور اپنی نگرانی میں آٹے اور چینی کا وزن کرا کر اطمینان کا اظہار کیا۔ انہوں نے آٹے اور چینی کی دستیابی اور فروختگی رجسٹر کے ریکارڈ کو بھی چیک کیا۔
انہوں نے صارفین سے اشیاء کی دستیابی، کوالٹی اور قیمتوں بارے بھی دریافت کیا اور اپنے اطمینان کا اظہار کیا۔ اس موقع پر ڈپٹی کمشنر نے بتایا کہ رمضان بازاروں میں 10کلو گرام آٹے کا تھیلا 400 روپے میں فراہم کیا جا رہا ہے جبکہ گھی مارکیٹ سے 50 روپے فی کلو گرام کم قیمت پر اور چینی 70 روپے فی کلو گرام میں دستیاب ہے۔انہوں نے کہاکہ حکومت کی ہدایت کے مطابق رمضان بازاروں میں عوام الناس کو سبسڈی پر بہترین سہولیات کے ساتھ اشیائے خوردونوش کی فراہمی کو یقینی بنانے کیلئے باقاعدگی سے چیکنگ کا عمل بھی جاری ہے۔
آج کی تازہ ترین ریٹ لسٹ دیکھیں
قبل ازیں ڈپٹی کمشنر نے ملکوال اوپن مارکیٹ میں سستے آٹے کی دستیابی اور ریکارڈ کو بھی چیک کیا۔ انہوں نے کہا کہ آٹے کے مقرر کردہ نرخوں سے زائد پر فروخت کو کسی بھی صورت برداشت نہیں کیاجائے گا، ایسی شکایات موصول ہونے پر پرائس ایکٹ کے تحت جرمانے کے ساتھ گرفتاری بھی عمل میں لائی جائے گی۔
بعد ازاں ڈپٹی کمشنر نے گندم خریداری مرکز ملکوال کا بھی دورہ کیا، انہوں نے کاشت کاروں کو باردانہ کی فراہمی ،خریداری و دیگر انتظامات کو چیک کیا۔ انہوں نے ڈیوٹی سٹاف کو اپنی ذمہ داری احسن طریقے سے سر انجام دینے کی ہدایت کی۔ انہوں نے کہاکہ سنٹر پر آنے والے کاشت کاروں کو مثالی سروسز فراہم کی جائے، کسانوں کے بیٹھنے کیلئے سایہ دار جگہ اور پنکھے چالو حالت میں ہونے چاہئیں۔ باردانہ کے اجراءکے حوالے سے کسی قسم کی کوئی شکایت موصول نہیں ہونی چاہیئے۔
