منڈی بہاو الدین( ایم.بی.ڈین نیوز 22دسمبر2020) ڈپٹی کمشنر طارق علی بسرا نے ٹی ایچ کیو ہسپتال پھالیہ کا اچانک دورہ کیا، اس موقع پر ایم ایس ٹی ایچ کیو پھالیہ ڈاکٹر بشریٰ چوہدری، ڈاکٹر صاحبان اور طبی عملہ بھی موجود تھا۔ اپنے دورے کے دوران ڈپٹی کمشنر نے ہسپتال میں ایمرجنسی، شعبہ ہیپاٹائیٹس، دندان سازی،امراض چشم، لیبارٹریز، پرچی کاﺅنٹر ، فارمیسی، سی ٹی سکین،ایکسرے روم،لیبر روم ،ڈسپنسری، امراض دل،آرتھوپیڈک،زنانہ مردانہ وارڈ کے علاوہ دیگر شعبوں کا دورہ کیا اور وہاں پر علاج معالجہ کیلئے آئے ہوئے مریضوں کو دی جانے والی طبی سہولیات کا بغورجائزہ لیا ۔
انہوں نے وارڈز میں مختلف مریضوں سے طبی سہولیات کی فراہمی سے متعلق استفسار بھی کیا جس پر مریضوں نے علاج معالجہ کے حوالے سے دی جانے والی سہولیات پر اپنے بھر پور اطمینان کا اظہار کیا۔اس موقع پر ایم ایس نے ڈپٹی کمشنر کو سرجن ڈاکٹر کی کمی اور دیگر ضروریات سے متعلق گزارشات پیش کیں جس پر ڈپٹی کمشنر نے انہیں فی الفور پورا کرنے کی یقین دہانی کروائی۔ انہوں نے ڈاکٹر صاحبان کو مخاطب کرتے ہوئے کہاکہ علاج معالجہ اور ٹیسٹنگ سے متعلق بین الاقوامی طور پر مصدقہ طبی پروٹوکول کو فالو کیا جائے اور طبی سہولیات کی فراہمی میں کورونا ایس او پیز کا مکمل خیال رکھا جائے۔
انہوں نے کہا کہ جو ادویات ہسپتال میں دستیاب ہیں وہ مریضوں کو علاج معالجہ کیلئے فوری طور پر مہیا کی جائیں ۔ انہوں نے ٹیسٹنگ لیب کا معائنہ کرتے ہوئے ڈاکٹرز اور ٹیکنیشنز کو واضح ہدایات جاری کرتے ہوئے کہا کہ وہ ایسے تمام ٹیسٹ جن کی سہولت ہسپتال میں موجود ہے باہر سے نہیں کئے جائیں گے اور ٹیسٹوں کی رپورٹ براہ راست وارڈ میں موجود ڈاکٹر اور مریض کو مہیا کی جائے۔انہوں نے کہا کہ صوبائی حکو مت سرکاری ہسپتالوں میں مریضوں کو مفت طبی علاج معالجہ کی فراہمی کیلئے کثیر فنڈز مہیا کر رہی ہے یہی وجہ ہے کہ ہسپتالوں میں طبی سہولیات کی بر وقت فراہمی کی وجہ سے عوام الناس کے اعتماد میں اضافہ ہوا ہے جو کہ ایک خوش آئند امر ہے۔
