منڈی بہاوالدین: نواحی گاوں میں ہوئی انوکھی شادی ،گاوں کے ہرخاندان کو 1000روپے اور کھانا بطورتحفہ دیاگیا،اہل علاقہ کاخراج تحسین، دولہا نے کہا کہ فضول رسومات پر خرچ کرنے کی بجائے لوگوں کو خوشیوں میں شامل کیا جانا چاہئے
منڈی بہاءالدین (ایم.بی.ڈین نیوز 5 مارچ 2022) منڈی بہاوالدین کے علاقہ دُھنی کلاں میں چوہدری ارشد تارڑ مرحوم کے بیٹے چوہدری شعیب ارشد تارڑ کی شادی توجہ کا مرکز بن گئی جس میں پورے گاوں کے ہر ایک گھر میں پورے گھر والوں کے لیئے کھانا بھی بھجوایا گیا اور ساتھ میں ایک ایک ہزار روپے نقد بطور تحفہ بھی دیے گئے۔
اس موقع پر دولہا شعیب ارشد تارڑ اور ان کے بھائی چوہدری نوید افتخار کا کہنا تھا کہ ہمیں شادی کے موقع پر فضول رسومات پر خرچ کرنے کی بجائے اپنے علاقہ کے تمام لوگوں کو خوشیوں میں شامل کرنا چاہئے تاکہ معاشرے میں اخوت اور بھائی چارہ کی فضا قائم ہو۔
انہوں نے کہاکہ آئندہ بھی گاوں میں دیگر شادیوں کے مواقع پر بھی فضول رسومات اور فضول خرچی کی حوصلہ شکنی کی جائے گی۔
