ڈپٹی کمشنر طارق علی بسرا نے کہا ہے کہپرائس کنٹرول مجسٹریٹس عادی گراں فروشوں اور ذخیرہ اندوزوں کوجرمانے کرنے کی بجائے جیل بھجوائیں، حکومت پنجاب کی ہدایت پر مہنگائی کے سد باب کیلئے پرائس مجسٹریٹس انسداد مہنگائی مہم کو مذید موثر اور فعال بنائیں.
منڈی بہاﺅالدین ( ایم.بی.ڈین نیوز یکم اکتوبر 2021) انہوں نے پرائس مجسٹریٹس صاحبان کو واضح ہدایات جاری کرتے ہوئے کہا کہ عام بازاروں اور مارکیٹوں میں دکانوں پر ریٹ لسٹیں نمایاں جگہوں پر آویزاں نہ کرنے والوں کو بھاری جرمانے کئے جائیں اور ذخیرہ اندوزوں اور ناجائز منافع خوروں کے خلاف ایف آئی آرز درج کروائی جائیں۔
ان خیالات کا اظہار انہوں نے ڈی سی آفس میں پرائس مجسٹریٹس کی کارکردگی کے حوالے سے پرائس کنٹرول کمیٹی کے اجلاس کی صدارت کرتے ہوئے کیا ۔ اجلاس میں ایڈیشنل ڈپٹی کمشنر ریونیو توقیر الیاس چیمہ، اسسٹنٹ کمشنر ملکوال عثمان غنی، ایڈیشنل ڈائریکٹر لائیو سٹاک ڈاکٹر محمد ممتاز بیگ، ڈپٹی ڈائریکٹر زراعت شیخ محمد اقبال، ڈی او انڈسٹریز رانامحمد سعید کے علاوہ مجسٹریٹس صاحبان اور متعلقہ محکموں کے افسران بھی موجود تھے۔
قبل ازیں ملٹی میڈیا کے ذریعے اجلاس کو بریفنگ دیتے ہوئے بتایا گیا کہ یکم ستمبر سے لے کر اب تک مجسٹریٹس صاحبان نے 16،858 انسپکشنز کیں اور پرائس ایکٹ کی1،157 خلاف ورزیاں پائے جانے پرمختلف دکانداروں ، بڑے سٹوروں اور سٹاکسٹ کو 22 لاکھ 52 ہزار 700 روپے جرمانے کئے گئے۔ 53 افراد کے خلاف ایف آئی آر درج کر وا کر 42 افراد کو گرفتار کروا دیا گیا۔ جس پرڈپٹی کمشنر طارق علی بسرا نے پرائس مجسٹریٹس صاحبان کو واضح ہدایت جاری کرتے ہوئے کہا کہ حکومت ضروری اشیائے خوردونوش،پھلوں ، سبزیوں کی قیمتوں میں استحکام لانے کیلئے پوری طرح سنجیدہ ہے اورموجودہ حالات میں اشیائے ضروریہ کی قیمتوں کو عوام الناس کی قوت خرید کے مطابق کرنے کیلئے تمام وسائل بروئے کار لا رہی ہے۔
انہوں نے پرائس مجسٹریٹ کو ہدایت کی کہ گراں فروشوں کے خلاف بلا تفریق آپریشن کیا جائے ، عام بازاروں اور مارکیٹوں میں اشیاء ضروریہ کی ریٹ لسٹ اور ریٹ بورڈ کو نمایاں جگہوں پر آویزاں کروائیں اور جو دکاندار اس پر عملدرآمد نہ کرے اس کے خلاف سخت کارروائی عمل میں لائی جائے۔ انہوں نے واضح کیا کہ اے سیز اور مجسٹریٹس پرائس کنٹرول آرڈینینس 2020کے مطابق کارروائی کریں۔ حکومت کی جانب سے صوبے بھر میں انسداد ذخیرہ اندوزی آرڈیننس 2020 کے تحت گراں فروشی اور ذخیرہ اندوزی کرنے والوں کے خلاف کریک ڈاﺅن جاری ہے اور اس آرڈینینس کے تحت اشیائے خورونوش کو ذخیرہ کرنا یا مہنگے داموں بیچنا ناقابل ضمانت سنگین جرم ہے۔
انہوں نے پرائس مجسٹریٹ صاحبان کو ہدایت کی کہ وہ اپنی کارکردگی بہتر بنائیں کیونکہ ان کی حقیقی کارکردگی اشیاء خوردونوش کی قیمتوں کو کنٹرول میں رکھ کر عوام الناس کو فائدہ پہنچانا ہے ، انہوں نے باور کرایا کہ وزیراعظم عمران خان اور وزیراعلیٰ پنجاب سردار عثمان بزدار کی واضح ہدایات کی روشنی میں اشیاء خوردونوش کی قیمتوں میں استحکام کو سو فیصد یقینی بنایا جائے۔ انہوں نے کہا کہ ہمیں حکومتی ہدایت کو سنجیدگی سے لے کر اس پر سوفیصدکارکردگی دکھانا ہوگی۔
