ڈپٹی کمشنر محمد شاہد اور ڈسٹرکٹ چیئرمین اوورسیز کمیٹی محمد عارف گوندل نے کہا ہے کہ سمندر پار پاکستانی وطن عزیز کیلئے گراں قدر خدمات سر انجام دے رہے ہیں، سردار عثمان بزدار حکومت سمندر پار پاکستانیوں کو یہاں پر درپیش مشکلات کے حل اور انہیں تمام ممکنہ ریلیف فراہم کرنے کیلئے انتہائی سنجیدہ ہیں، انہوں نے کہا کہ اوورسیز کمیٹی کے اجلاسوں میں درخواستوں اور شکایات کا فوری نوٹس لے کر بلا تاخیر محکمانہ اقدامات کو یقینی بنانے کی ہدایات بھی جاری کی جاتی ہیں۔
منڈی بہاﺅلدین ( ایم.بی.ڈین نیوز 28 دسمبر 2021) ان خیالات کا اظہارا انہوں نے آج یہاں ڈپٹی کمشنر آفس میں ڈسٹرکٹ اوورسیز پاکستانیز کمیٹی کے اجلاس سے خطاب کرتے ہوئے کیا۔ اجلاس میں ڈسٹرکٹ پولیس آفیسر انور سعید کنگرا، ایڈیشنل ڈپٹی کمشنر ریونیو ڈاکٹر احسان الحق ضیاء، اسسٹنٹ کمشنر منڈی بہاﺅالدین کاشف جلیل، اسسٹنٹ کمشنر پھالیہ محمد عرفان ہنجرا، اسسٹنٹ کمشنر ملکوال عثمان غنی، ڈسٹرکٹ اٹارنی، فوکل پرسن و تحصیل کونسل آفیسر شہزاد اختر تارڑ، پراسیکیوشن وریونیو افسران ، ممبر اورسیز کمیٹی فیصل گوندل، ترجمان اوورسیز کمیٹی حمزہ علی، مختلف محکموں کے افسران، درخواستگزار اور اوورسیز پاکستانیز کے نمائندے بھی موجود تھے۔
اجلاس میں اراضی پر قبضوں، مشترکہ راستوں پرآمدورفت میں رکاوٹ، جائیدادوں کی وراثتی تقسیم، رقوم کے لین دین، تجاوزات، دھوکہ دہی اور دیگر مسائل پر مشتمل درخواستیں اور شکایات پیش کی گئیں۔ قبل ازیں اجلاس میں اوورسیز پاکستانیوں کے مسائل سے متعلق کمیٹی میں24 شکایات پیش کی گئیں جن میں سے10 درخواستوں کے حل کیلئے موقع پر ہی احکامات جاری کر دئیے گئے۔
ڈپٹی کمشنرنے مختلف محکموں کے افسران کو کیسز سے متعلق اپنی پراگریس رپورٹ اور بعض زیر التوا کیسز میں فوری کاروائی کر کے میرٹ پر رپورٹ پیش کرنے کی ہدایت کی۔ انہوں نے متعلقہ اسسٹنٹ کمشنرز ، پولیس اور دیگر محکموں کو ہدایت کی کہ وہ اوورسیز پاکستانیز کے مسائل کے حل کرنے میں خصوصی دلچسپی لیں اوراعلیٰ حکام کی جانب سے احکامات پر عملدرآمد کو یقینی بنائیں۔ ڈسٹرکٹ چیئرمین اوورسیز نے کہاکہ بیرون ممالک میں مقیم پاکستانیز پاکستان کی شناخت اور سفیر ہیں ان کے مقامی سطح پرمسائل ترجیحی بنیادوں پر حل کئے جا رہے ہیں۔
انہوں نے افسران کو ہدایت کی کہ اوورسیز پاکستانیز کو کیسز کے فیصلوں سے متعلق مکمل آگاہی بھی فراہم کی جائے اور وہ پوری تیاری کے ساتھ اجلاس میں شرکت کو بھی یقینی بنائیں۔ ڈی پی او انور سعید کنگرا نے کہاکہ اوورسیز پاکستانیز کے مفادات کا تحفظ ہر صورت میں یقینی بنایا جائے گا۔ نا جائز قابضین اور دھوکہ دہی کے مرتکب افراد کو قانون کے شکنجے میں لایا جائے گا اور کسی فریق کے ساتھ نا انصافی نہیں ہونے دی جائے گی۔
