منڈی بہاﺅلدین ( ایم.بی.ڈین ینوز 16 دسمبر 2021)ایڈیشنل ڈپٹی کمشنر جنرل محمد شفیق نے کہا ہے کہ پاکستان میں تمام مذاہب کے لوگوں کو مکمل مذہبی آزادی حاصل ہے اور تمام مذاہب کا احترام کر کے فلاحی معاشرے کی تشکیل دی جا سکتی ہے۔ انہوں نے کہاکہ مسیحی برادری کے لوگ ہمارے بھائی ہیں، کرسمس کے تہوار کو جوش و جذبے سے منانے کیلئے چرچوں ، پارکس اور دیگر تفریحی مقامات پر سکیورٹی کے خصوصی انتظامات کئے جائیں گے۔
ان خیالات کااظہار انہوں نے آج یہاں ڈی سی آفس میں انسانی حقوق کے حوالے سے منعقدہ اجلاس کی صدارت کرتے ہوئے کیا۔ اجلاس میں اسسٹنٹ کمشنر منڈی بہاﺅالدین کاشف جلیل ، ڈپٹی ڈائریکٹر سوشل ویلفیئر اینڈ بیت المال عاطف علی وڑائچ، اسسٹنٹ سپرنٹنڈنٹ جیل معصب بلال گوندل، اقلیتی نمائندے و ممبر ہیومن رائٹس ارشد گل، حلیم گل اور دیگر افسران نے شرکت کی۔
یہ بھی پڑھیں: کرسمس کی تیاریوں کے حوالے سے منڈی بہاءالدین میں امن کمیٹی کا اہم اجلاس
ایڈیشنل ڈپٹی کمشنر محمد شفیق نے خطاب کرتے ہوئے کہاکہ جو حقوق اسلام نے اقلیتوں کیلئے مقرر کئے ہیں وہ کسی اور معاشرے میں نہیں ہیں ، حکومت تمام مذاہب کے حقوق کے تحفظ کے لئے بھر پور اقدامات کر رہی ہے۔ انہوں نے انسانی حقوق کی پاسداری پر زور دیتے ہوئے کہاکہ کسی بھی معاشرے کی ترقی و استحکام عزت اور وقار سے براہ راست منسلک ہے۔ اس لئے تیزی سے بدلتے ہوئے حالات میں معاشرتی نظام کو سبوتاژ ہونے سے بچانے کے لئے امتیازی سلوک کے خلاف آواز اٹھانا ہم سب کا قومی فریضہ ہے۔
انہوں نے بتایا کہ ضلعی انتظامیہ نے کرسمس کے پر مسرت موقع پر مسیحی آبادیوں کے اطراف میں صفائی ستھرائی، لائٹنگ اور کرسمس بازاروں کے قیام کی تیاریاں شروع کر دی ہیں۔ انہوں نے مزید بتایا کہ کرسمس پر مسیحی برادری کیلئے سیکورٹی کے فل پروف انتظامات کئے جائیں گے۔ ضلع بھر میں گرجا گھروں اور دیگر عبادت گاہوں کی سکیورٹی کیلئے پولیس ملازمین ،ایلیٹ اور قومی رضاکاروں کی ڈیوٹیاں لگائی جا رہی ہیں اور اس سلسلہ میں پولیس ملازمین کی چھٹیاں منسوخ کر کے ضلع کے داخلی اور خارجی راستوں پر تعینات کیا جائے گا۔
