ڈنگہ، ڈاکووں سے مقابلے کے دوران شہید ہونے والے گجرات پولیس کے اہلکار کی نماز جنازہ ادا کر دی گئی۔ گجرات پولیس نے ہلاک ہونے والے تینوں ملزمان کی شناخت ظاہر کر دی۔ ایک ملزم کا تعلق ہیڈ رسول لوکڑی منڈی بہاوالدین سے تھا۔
منڈی بہاوالدین (ایم.بی.ڈین نیوز یکم مارچ 2021) تفصیلات کے مطابق گزشتہ شام ایس ایچ او تھانہ صدر کھاریاں سرفراز احمد اور ایس ایچ او تھانہ ڈنگہ فراست اللہ نے پولیس نفری اور ایلیٹ فورس کے ہمراہ سنگین مقدمات میں مطلوب خطرناک مجرمان اشتہاریوں کی گرفتاری کے لئے تھانہ ڈنگہ کے علاقہ کولیاں شاہ حسین کے قریب ناکہ بندی کررکھی تھی کہ دو موٹر سائیکلوں پر سوار پانچ مشکوک افراد موضع ڈھنڈالہ کی طرف سے آئے،جنہیں پولیس نے رکنے کا اشارہ کیا، تو ملزمان نے پولیس پر سیدھی فائرنگ شروع کردی۔ جس کی زد میں آکر ایلیٹ فورس کا ایک جوان ذوالفقار حیدر 884/Cشہید ہو گیا۔جبکہ فائرنگ کے تبادلے میں تین ڈاکو بھی ہلاک ہو گئے۔
جن کی بعد میں شناخت 1۔علی حسنین ولد امانت علی سکنہ وڑائچاں والا ضلع گجرات،2۔ علی رضا عرف ٹیپو شاہ ولد فخر حسین سکنہ مدینہ سیداں ضلع گجرات، 3-مبشر اقبال ولد یار محمد سکنہ ہیڈ رسول لوکڑی ضلع منڈی بہاوالدین کے ناموں سے ہوئی۔جبکہ دو ملزمان اندھیرے کا فائدہ اٹھاتے ہوئے موقع سے فرار ہوگئے۔ ہلاک ہونے والے ملزمان کے خلاف قبل ازیں قتل،اقدام قتل،ڈکیتی، راہزنی، چوری،پولیس مقابلہ،ناجائز اسلحہ اور فراڈسمیت دو درجن سے زائد سنگین نوعیت کے مقدمات درج تھے۔جنہوں نے گزشتہ ماہ تھانہ صدر کھاریاں کے علاقہ میں دوران ڈکیتی ایک شخص کو مزاحمت کرنے پر قتل کردیا تھا۔ فرار ہونے والے ملزمان کی گرفتار ی کے لئے سرچ آپریشن جاری ہے۔
