منڈی بہاﺅالدین( ایم.بی.ڈین نیوز 13 جنوری 2021)ڈپٹی کمشنر طارق علی بسرا نے کہا ہے کہ وطن عزیز کو پولیو سے پاک کرنے کیلئے ہر فرد کو انسداد پولیو مہم کی کامیابی کیلئے کلیدی کردار ادا کرنا ہوگا، انہوں نے کہا کہ وزیراعلیٰ پنجاب سردار عثمان بزدار کے ویژن کے مطابق صوبہ پنجاب کو پولیو فری بنانے کیلئے کوئی کسر نہ اٹھا رکھی جائے گی اور اس ضمن میں صوبے بھر میں پولیو کے خاتمہ کی کوششوں کو تقویت دینے کیلئے تمام وسائل بروئے کار لائے جا رہے ہیں ۔
ان خیالات کااظہار انہوں نے شہر کے مختلف علاقوں بالخصوص خانہ بدوش جگھیوں میں 5سال تک کی عمر کے بچوں کی پولیو ویکسی نیشن کی چیکنگ کرتے ہوئے کیا۔ڈپٹی کمشنر نے خانہ بدوش جگھیوں میں جا کر بچوں کے ہاتھوں پر لگے نشانات کے ذریعے پولیو ویکسی نیشن کو چیک کیا ۔اس موقع پر ڈپٹی کمشنر نے کہا کہ معاشرے کے ہر طبقے کے والدین کا فرض ہے کہ وہ اپنے بچوں کو عمر بھر کی معذوری سے بچانے کیلئے پولیو ویکسین کے قطرے لازماً پلوائیں۔انہوں نے کہا کہ پولیو فری پاکستان ہمارا مشن ہے تاکہ آنے والی نسلوں کو پولیو جیسے موذی مرض سے نجات دلا کر پاکستان کا مستقبل صحت مند اور تابناک بنایا جاسکے۔
انہوں نے بتایا کہ انسداد پولیو ٹیمیں صوبہ کے تمام شہروں میں پانچ سال سے کم عمر کے بچوں کو پولیو ویکسین کے قطرے پلا رہی ہیں کیونکہ یہ قطرے ہماری نسل کو عمر بھر کی معذوری سے بچانے کیلئے فائدہ مند ہیں۔ انہوں نے کہا کہ پولیو کا خاتمہ قومی ذمہ داری ہے اور فیلڈ میں مصروف عمل پولیو ٹیمیں احساس ذمہ داری کے ساتھ قومی فریضہ سر انجام دے رہی ہیں ،تمام شہریوں بالخصوص والدین کا فرض ہے کہ وہ پولیو ٹیموں کے ساتھ بھر پور تعاون کا مظاہرہ کریں تا کہ ضلع کا پولیو فری سٹیٹس برقرار رکھا جا سکے۔
