ڈپٹی کمشنر محمد شاہدکی زیر صدارت ضلع کونسل ہال میں ریونیو عوامی خدمت کچہری کا انعقاد ہوا، جس میں ایڈیشنل ڈپٹی کمشنر ریونیو ڈاکٹر احسان الحق ضیاء، ایڈیشنل ڈپٹی کمشنر جنرل محمد شفیق، نائب تحصیلدار وقار احمد، لینڈ ریکارڈ سنٹر اور ریونیو افسران سمیت سائلین کی کثیر تعداد بھی موجود تھی۔
منڈی بہاﺅالدین( ایم.بی.ڈین نیوز 03جنوری 2022) ڈپٹی کمشنر نے ریونیو عوامی خدمت کچہری میں آئے ہوئے سائلین سے خود بھی توجہ اور خلوص سے ان کے مسائل سنے اور ان کے حل کے لئے موقع پر احکامات جاری کئے۔ اس موقع پر ڈپٹی کمشنر نے کہا کہ عوام کے ریونیو سے متعلقہ مسائل کا ایک ہی جگہ پر فوری حل اولین ترجیح ہے، وزیراعلیٰ پنجاب سردار عثمان بزدار کی ہدایت کے مطابق سائلین سے براہ راست مسائل سن کر ون ونڈوآپریشن کے تحت حل کئے جا رہے ہیں۔
یہ بھی پڑھیں: ڈپٹی کمشنر کا ضلع کمپلیس میں کھلی کچہری کا انعقاد، عوامی مسائل سنے
انہوں نے افسران کو ہدایت کی کہ وہ اوپن ڈور پالیسی کے تحت آنے والے سائلین کے مسائل کو بر وقت حل کریں کیونکہ عوامی مسائل کو حل کرنا ہی ہماری بنیادی ذمہ داری ہے ، انہوں نے کہا کہ ریونیو عوامی خدمت کچہری میں سائلین کی طرف سے پیش کردہ مسائل پر جاری کردہ احکامات پر بلا تاخیر عملدرآمد کو یقینی بنایا جائے ، اس سلسلہ میں کسی قسم کی غیر ضروری تاخیر ہر گز برداشت نہیں کی جائے گی۔
دریں اثناءڈپٹی کمشنر کی ہدایت پر ایڈیشنل ڈپٹی کمشنر ریونیو اور اسسٹنٹ کمشنر نے ضلع کونسل ہال میں عوامی خدمت کچہری کے انعقاد کے حوالے سے انتظامات کئے تھے۔ ڈپٹی کمشنر نے انتظامات کا بھی جائزہ لیا اور اگلی کچہری تک انتظامات کو مذید بہتر بنانے کی ہدایت کی۔اسی طرح تحصیل پھالیہ اور ملکوال میں بھی متعلقہ اسسٹنٹ کمشنرز کی زیر صدارت ریونیو عوامی خدمت کچہریاں لگائی گئیں.
خدمت کچہریوں میں آغاز سے لے کر اختتام تک آنے والے سائلین نے اپنے مختلف مسائل کے حوالے سے درخواستیں پیش کیں، جنہیں وہاں پر افسران کی موجودگی میں عملہ نے فوری طور پر کاروائی کر کے موقع پر نبٹا دیا جبکہ دیرینہ مسائل والی درخواستوں کو ایک دو روز میں حل کرنے کی یقین دہانی کروائی گئی۔
