پی ڈی ایم اے پنجاب نے دریائے چناب اور ملحقہ ندی نالوں میں درمیانے سے اونچے درجے کے سیلاب کی وارننگ جاری کر دی ہے۔
ترجمان پی ڈی ایم اے کے مطابق دریائے چناب میں مرالہ، خانکی اور قادر آباد کے مقام پر درمیانے سے اونچے درجے کا سیلاب آنے کا امکان ہے۔ پنجاب کے گوجرانوالہ، سرگودھا، فیصل آباد اور ملتان ڈویژن کے کمشنرز کو الرٹ جاری کر دیا گیا ہے۔
اسی طرح نارووال، گجرات، منڈی بہاؤالدین، سرگودھا، خوشاب، جھنگ، چنیوٹ، خانیوال، ملتان، کوٹ ادو، مظفر گڑھ، سیالکوٹ، گوجرانوالہ، حافظ آباد اور وزیرآباد کے ڈپٹی کمشنرز کو الرٹ رہنے کی ہدایت کی گئی ہے۔
ترجمان نے کہا کہ ڈی جی پی ڈی ایم اے ریلیف کمشنر پنجاب نبیل جاوید نے لوکل گورنمنٹ، محکمہ زراعت، محکمہ آبپاشی، محکمہ صحت، محکمہ جنگلات، لائیو سٹاک اور محکمہ ٹرانسپورٹ کو صورتحال سے نمٹنے کے لیے تیار رہنے کا حکم دیا ہے۔ انہوں نے وزیراعلیٰ پنجاب کی ہدایات کے پیش نظر تمام انتظامات پہلے سے مکمل کرنے کی بھی ہدایت کی ہے۔
نبیل جاوید کا کہنا ہے کہ ایمرجنسی کنٹرول رومز میں سٹاف کو 24 گھنٹے الرٹ رکھا جائے۔ ریسکیو 1122 کی ڈیزاسٹر ریسپانس ٹیموں کو بھی ہائی الرٹ رکھا جائے۔ عوام کو سیلاب کی ممکنہ صورتحال سے لمحہ بہ لمحہ باخبر رکھا جائے۔
دوسری جانب ڈی جی پی ڈی ایم اے نے ہدایت کی ہے کہ ضلعی افسران دریا کے کنارے گھروں اور مویشیوں کے انخلاء کو یقینی بنائیں۔ عوام جاری کردہ احتیاطی تدابیر پر عمل کریں اور دریاؤں، نہروں، ندی نالوں اور تالابوں میں کبھی نہ نہائیں۔
ان کا مزید کہنا تھا کہ ہنگامی انخلاء کی صورت میں انتظامیہ کے ساتھ تعاون کریں۔ شہری ایمرجنسی کی صورت میں PDMA ہیلپ لائن 1129 پر رابطہ کریں۔
