حکومت نے مہنگائی پر قابو پانے کیلئے اشیائے خور و نوش کی قیمتوں پر ٹیکسز کم کرنے کا فیصلہ کرلیا۔ وزیراعظم عمران خان نے وزراء کو اپنے اپنے حلقوں میں مصنوعی مہنگائی پر نظر رکھنے اور پرائس کنٹرول کمیٹیوں کو متحرک کرنے کی ہدایت کردی۔
وزیراعظم کی زیر صدارت ملکی معاشی صورتحال اور مہنگائی سے متعلق امور پر اجلاس ہوا، جس میں عمران خان کو مہنگائی اور ذخیرہ اندوزی کی صورتحال پر بریفنگ دی گئی۔ اجلاس میں پیٹرولیم مصنوعات کی قیمتوں میں اضافے کا بھی جائزہ لیا گیا۔ اجلاس میں فیصلہ کیا گیا کہ اشیائے خور و نوش کی قیمتیں کم کرنے کیلئے اُن پر عائد ٹیکسز کم کئے جائیں گے۔
وزیراعظم نے وزراء کو پرائس کنٹرول کمیٹیز کو متحرک کرنے کیلئے اقدامات کی ہدایت کردی۔ وزیراعظم نے ہدایت کی کہ وزراء اپنے حلقوں میں مصنوعی مہنگائی پر نظر رکھیں، مصنوعی مہنگائی کرنیوالوں اور ذخیرہ اندوزوں کیخلاف سخت کارروائی کی جائے۔ واضح رہے کہ حکومت نے گزشتہ ہفتے بجلی اور پیٹرولیم مصنوعات کی قیمتوں میں اضافہ کردیا تھا
