اسسٹنٹ کمشنر کا منڈی بہاوالدین میں تجاوزات کیخلاف آپریشن، رکاوٹیں ختم کروادیں

منڈی بہاو الدین( ایم.بی.ڈین نیوز 04دسمبر2020 )اسسٹنٹ کمشنر منڈی بہاﺅالدین ملک کاشف نواز نے کہا ہے کہ تجاوزات کے خاتمے تک کریک ڈاﺅن جاری رہے گا، تاجر حضرات تجاوزات کے خاتمے اور کورونا ایس او پیز پر رعملدرآمد کے لئے انتظامیہ سے معاونت کریں۔ان خیالات کا اظہار انہوں نے کمیٹی بازار، لنڈا بازار، صدر بازار، وارڈ نمبر 5، موٹا فیقا چوک، میونسپل کمیٹی چوک، غلہ منڈی اور سبزی منڈی میں تجاوزات کے خلاف آپریشن کے دوران کیا۔یہ آپریشن تحصیل انتظامیہ اور میونسپل کمیٹی نے مشترکہ طور پر کیا۔

دریں اثناءبازاروں اور مارکیٹوں میں فٹ پاتھوں پر اور دکانوں کے آگے تجاوزات کی وجہ سے پیدل چلنے والوں کو مشکلات کا سامنا کرنا پڑتا تھا۔عوام الناس کی آمد و رفت میں مشکلات کے پیش نظر تحصیل انتظامیہ نے انسداد تجاوات آپریشن شروع کر دیا اور کمیٹی بازار ، لنڈا بازار میں آپریشن کر کے فوری طور پر تجاوزات کو ختم کر دیا اور تمام سامان اٹھوا دیا جبکہ ریڑھیاں بھی بازاروں سے باہر نکلوا دی گئی ہیں۔ تجاوزات کے خاتمے کے بعد بازاروں میں تنگ نظر آنے والے راستے اور بازار کھلے کھلے لگنے لگے اور وہاں سے ھزرنے والے صارفین بالخصوص خواتین ، بچوں اور بزرگوں نے سکون اور تحفظ کا اظہار کیا۔

شہر میں ٹریفک کی روانی تجاوزات اور بے ہنگم ٹریفک سے متاثر، شہر کی تمام سڑکوں پر ٹریفک بلاک رہنا معمول بن گیا. ریسکیو ایمبولینس کو بھی راستہ ملنا مشکل ہوگیا۔ ویڈیو دیکھیں

اس موقع پر اسسٹنٹ کمشنر نے کہا کہ تجاوزات قائم کر کے عوام اور ٹریفک کیلئے مسائل پیدا کرنے والوں کے خلاف کریک ڈاﺅن جاری رہے گا۔ انہوں نے خبردار کیا کہ بازاروں، فٹ پاتھوں اور عوامی سہولت والی تمام جگہوں پر سے تجاوزات رضاکارانہ طور پر ہٹا دی جائیں ورنہ خلاف ورزی پر حکومتی ہدایت کے مطابق سخت کاروائی عمل میں لائی جائے گی۔