اسسٹنٹ کمشنر ملکوال کا ٹی ایچ کیو ہسپتال ملکوال کا دورہ

منڈی بہاﺅالدین(ایم.بی.ڈین نیوز 27جنوری 2021 ) ڈپٹی کمشنر طارق علی بسرا کی ہدایت پر اسسٹنٹ کمشنر ملکوال عثمان غنی نے ٹی ایچ کیو ہسپتال ملکوال کا اچانک دورہ کیا، اس موقع پر ایم ایس ٹی ایچ کیو ملکوال ڈاکٹر ناصر وقار، ڈاکٹر صاحبان اور طبی عملہ بھی موجود تھا۔

اپنے دورے کے دوران اسسٹنٹ کمشنر نے ہسپتال میں ایمرجنسی، لیبارٹریز، پرچی کاﺅنٹر ، فارمیسی، ایکسرے روم،لیبر روم ،ڈسپنسری، زنانہ مردانہ وارڈ کے علاوہ دیگر شعبوں کا معائنہ کیا اور وہاں پر علاج معالجہ کیلئے آئے ہوئے مریضوں کو دی جانے والی طبی سہولیات کا بغورجائزہ لیا ۔ انہوں نے وارڈز میں مختلف مریضوں سے طبی سہولیات کی فراہمی سے متعلق استفسار بھی کیا جس پر مریضوں نے علاج معالجہ کے حوالے سے دی جانے والی سہولیات پر اپنے بھر پور اطمینان کا اظہار کیا۔اے سی نے ڈاکٹر صاحبان کو مخاطب کرتے ہوئے کہاکہ علاج معالجہ اور ٹیسٹنگ سے متعلق بین الاقوامی طور پر مصدقہ طبی پروٹوکول کو فالو کیا جائے اور طبی سہولیات کی فراہمی میں کورونا ایس او پیز کا مکمل خیال رکھا جائے۔

انہوں نے کہا کہ جو ادویات ہسپتال میں دستیاب ہیں وہ مریضوں کو علاج معالجہ کیلئے فوری طور پر مہیا کی جائیں ۔ انہوں نے ٹیسٹنگ لیب کا معائنہ کرتے ہوئے ڈاکٹرز اور ٹیکنیشنز کو واضح ہدایات جاری کرتے ہوئے کہا کہ وہ ایسے تمام ٹیسٹ جن کی سہولت ہسپتال میں موجود ہے باہر سے نہیں کئے جائیں گے اور ٹیسٹوں کی رپورٹ براہ راست وارڈ میں موجود ڈاکٹر اور مریض کو مہیا کی جائے۔

عثمان غنی نے کہا کہ صوبائی حکو مت سرکاری ہسپتالوں میں مریضوں کو مفت طبی علاج معالجہ کی فراہمی کیلئے کثیر فنڈز مہیا کر رہی ہے یہی وجہ ہے کہ ہسپتالوں میں طبی سہولیات کی بر وقت فراہمی کی وجہ سے عوام الناس کے اعتماد میں اضافہ ہوا ہے جو کہ ایک خوش آئند امر ہے۔