ڈپٹی کمشنرطارق علی بسرا نے 20 سے 24ستمبر 2021 تک جاری رہنے والی انسداد پولیو مہم کی ٹیموں کی کارکردگی کا اچانک معائنہ کیا، انہوں نے کنگ چوک سے ریلوے پھاٹک تک زیر تعمیر سڑک کے ترقیاتی کام کا بھی معائنہ کیا۔
منڈی بہاﺅالدین ( ایم.بی.ڈین نیوز 22ستمبر 2021) ڈپٹی کمشنر نے تیسرے روز انسداد پولیو مہم میں حصہ لینے والی پولیوٹیموں کی انسپکشنز کے دوران ٹرانزٹ پوائنٹس اور ڈور ٹو ڈور جانے والی انسداد پولیو ٹیموں کی جانب سے پلائے گئے قطروں کو بچوں کی ہاتھوں کی انگلیوں پر لگائے گئے نشانات سے چیک کیا ۔ انہوں نے خود بھی پولیو ٹیموں کی مدد سے بچوں کو پولیو ویکسین کے قطرے پلائے۔
بارش کے بعد منڈی بہاوالدین کی سڑکوں کے کیا حالات ہوتے ہیں؟ ویڈیو دیکھیں
اس موقع پر انہوں نے انسداد پولیو ٹیموں کو مخاطب کرتے ہوئے کہا کہ عملی اقدامات سے ہی پولیو کا خاتمہ ممکن ہے۔ تقریروں اور باتوں سے اہداف حاصل نہیں کئے جا سکتے۔محکمہ صحت کی ٹیمیں پولیو ویکسین کے قطرے پلانے کے ساتھ ساتھ لوگوں کو شعوری آگاہی بھی فراہم کریں تاکہ وہ اپنے بچوں کو رضاکارانہ طور پر پولیو ویکسین کے قطرے پلوائیں۔ انہوں نے کہا کہ وزیراعظم پاکستان عمران خان اور وزیراعلیٰ پنجاب سردار عثمان بزدار کی ہدایت کی روشنی میں ملک کو پولیو فری بنانے کیلئے جنگی بنیادوں پر اقدامات اٹھائے جارہے ہیں۔
انہوں نے کہا کہ محکمہ صحت بالخصوص انسداد پولیو ٹیموں کے افسران، اہلکاران اور پولیو ورکرز محکمے کا قابل فخر سرمایہ ہیں۔ امید ہے کہ سب کی عملی اور انتھک کاوشوں سے ملک بالخصوص صوبہ پنجاب بہت جلد پولیو فری زون بن جائے گا۔ قبل ازیں ڈپٹی کمشنر نے کنگ چوک سے ریلوے پھاٹک تک زیر تعمیر سڑک کے ترقیاتی کام کا بھی معائنہ کیا اور موقع پر موجود افسران کوسڑک کی جلد از جلد تعمیر کے حوالے سے ضروری ہدایات بھی جاری کیں تا کہ اس اہم شاہراہ پر زیادہ رش کی وجہ سے عوام کو درپیش مشکلات کا کم کیا جا سکے۔
