ڈپٹی کمشنر محمد شاہد نے نئے ڈسٹرکٹ ہیڈ کوارٹر ہسپتال کا اچانک دورہ کیا، اس موقع پر اسسٹنٹ کمشنر منڈی بہاﺅالدین کاشف جلیل، ایم ایس ڈاکٹر قمرالزمان، ایڈمن آفیسر کاشف حسین، ڈاکٹر صاحبان اور طبی عملہ بھی موجود تھا۔
منڈی بہاﺅلدین( ایم.بی.ڈین نیوز 31 دسمبر 2021 ) اپنے دورے کے دوران ڈپٹی کمشنر نے ہسپتال میں ایمرجنسی، لیبارٹریز، فارمیسی، لیبر روم ، وارڈز کے علاوہ دیگر شعبوں کا معائنہ کیا اور وہاں پر علاج معالجہ کیلئے آئے ہوئے مریضوں کو دی جانے والی طبی سہولیات کا بغورجائزہ لیا ۔ انہوں نے وارڈز میں مختلف مریضوں اور ان کے لواحقین سے طبی سہولیات کی فراہمی سے متعلق استفسار بھی کیا جس پر مریضوں نے علاج معالجہ کے حوالے سے دی جانے والی سہولیات پر اپنے بھر پور اطمینان کا اظہار کیا۔
یہ بھی پرھیں: پھالیہ: ہسپتال میں صفائی کے ناقص انتظامات پر ڈپٹی کمشنر نے ایم ایس کو ڈانٹ پلا دی
ڈپٹی کمشنر نے ڈاکٹر صاحبان کو مخاطب کرتے ہوئے کہاکہ مریضوں کو طبی لحاظ سے ہر ممکن سہولیات کی بر وقت فراہمی آپ کی بنیادی اور پیشہ وارانہ ذمہ داری ہے اور اس سلسلے میں غفلت یا تاخیر نا قابل قبول ہو گی۔ انہوں نے بتایا کہ ضلعی انتظامیہ کی سرکاری ہسپتالوں میں مریضوں کو علاج معالجہ کی فراہم کردہ سہولیات کی دستیابی پر کڑی نظر مرکوز ہے تا کہ مریضوں کو طبی سہولیات کی فراہمی کا عمل بلا تعطل جاری رہے۔
انہوں نے ہدایت کی کہ علاج معالجہ اور ٹیسٹنگ سے متعلق بین الاقوامی طور پر مصدقہ طبی پروٹوکول کو فالو کیا جائے اور طبی سہولیات کی فراہمی میں کورونا ایس او پیز کا مکمل خیال رکھا جائے۔ڈپٹی کمشنر نے ہسپتال میں قائم پناہ گاہ کا بھی دورہ کیا۔ اس موقع پر انہوں نے کہا کہ پناہ گاہ کا قیام سماجی خدمت کے شعبہ میں ایک نئے باب کا اضافہ ہے، جو وزیراعظم عمران خان اور وزیراعلیٰ سردار عثمان بزدار کی حکومت کی جانب سے عوامی خدمت کا ایک انقلابی اقدام ہے جہاں مریضوں کے لواحقین ،بے سہارا اور پردیسی لوگوں کو بے پناہ ریلیف حاصل ہو رہا ہے۔
محمد شاہد نے کہا کہ پناہ گاہ میں قیام سے لوگوں کو ایک معیاری اور بہترین پناہ گاہ کی شکل میں قیام و طعام کی سہولت میسر آ رہی ہے جو کہ عوامی خدمت کے سفر میں سنگ میل کی حیثیت رکھتی ہے ۔
