ڈپٹی کمشنر ڈاکٹر احسان الحق ضیاءنے کہا ہے کہ وزیراعظم پاکستان عمران خان کا منصوبہ برائے گھریلو مرغبانی کا مقصد عوام کو معیاری اور رعائتی نرخوں پر دیسی انڈوں کی شکل میں سستی پروٹین کی فراہمی ہے ۔ دیسی انڈے اعلیٰ پروٹین حاصل کرنے کا بہترین ذریعہ ہیں جو کہ جسمانی اور ذہنی نشوونما کیلئے انتہائی ضروری ہے ۔
منڈی بہاﺅلدین(ایم.بی.ڈین نیوز 06 دسمبر 2021 )ان خیالات کا اظہار انہوں نے آج یہاں محکمہ لائیو سٹاک کے ویٹرنری ہسپتال منڈی بہاﺅالدین میں گھریلو مرغبانی خواہش مند خواتین و حضرات میں مرغیوں کے یونٹ تقسیم کر تے ہوئے کیا۔ اس موقع پر ایڈیشنل ڈائریکٹر لائیو سٹاک ڈاکٹر محمد ممتاز بیگ، ڈپٹی ڈائریکٹر لائیو سٹاک منڈی بہاﺅالدین ڈاکٹر ضیاء اللہ گوندل، سینئر ویٹرنری آفیسر ڈاکٹر محمد رضوان اور دیگر بھی موجود تھے۔
ایڈیشنل ڈائریکٹر لائیو سٹاک ڈاکٹر محمد ممتاز بیگ نے بتایا کہ وزیر اعلیٰ پنجاب اور سیکرٹری لائیو سٹاک پنجاب کی ہدایت پرمحکمہ لائیو سٹاک منڈی بہاﺅالدین نے دیہی مرغبانی کے خواہش مند خواتین و حضرات میں مرغیوں کے 230 یونٹس تقسیم کئے جا رہے ہیں۔ ایک یونٹ ایک مرغا 5 مرغیوں پر مشتمل ہے۔ جن کی مارکیٹ قیمت مبلغ 1620 روپے ہے اور 30 فیصد سبسڈی پر 1140 روپے فی یونٹ پر دی جا رہی ہیں ۔
اس سکیم سے استفادہ کیلئے ویٹرنری ہسپتالوں میں درخواستیں وصول کی جاتی ہیں اور پہلے آئیے پہلے پائیے کی بنیاد پریونٹ تقسیم کئے جاتے ہیں۔ اس سکیم کے تحت مرغیوں کو تمام بیماریوں کی ویکسین اور ڈیورمنگ کا کورس مکمل کرواکرصحت مند مرغیاں خواہش مند حضرات میں تقسیم کی جاتی ہیں۔ جس پر ڈپٹی کمشنر احسان الحق نے کہا کہ محکمہ لائیو سٹاک کی پولٹری یونٹس کی رعائتی نرخوں پر فروخت دیہی مرغبانی کے فروغ کیلئے اہم اقدام ہے ۔
