چینی، آٹا، گھی، دالوں اور چاول پر مستحقین کے لیے سبسڈی ختم

حکومت نے مستحقین کے لیے چینی، آٹا، گھی، دالوں اور چاول پر سبسڈی ختم کردی ہے۔ یوٹیلیٹی سٹورز سے رعایتی نرخوں پر اشیاء کی فروخت فوری طور پر بند کر دی گئی۔

یوٹیلیٹی اسٹورز پر 50 ارب روپے کی سبسڈی پر عمل درآمد روک دیا گیا ہے۔ حکومت نے سبسڈی بند کرنے کا زبانی حکم دیا۔ تحریری احکامات جلد جاری کیے جائیں گے۔ سبسڈی روکنے کا فیصلہ وفاقی کابینہ کے حالیہ اجلاس میں کیا گیا۔

سبسڈی بند کرنے سے 26 ملین مستحق خاندان متاثر ہوں گے۔ ماہانہ 40 ہزار سے کم آمدنی والے افراد کو یوٹیلیٹی سٹورز سے سبسڈی مل رہی تھی لیکن آٹا، گھی، چاول، چینی اور دالوں پر مزید سبسڈی نہیں ہوگی۔

اب یوٹیلیٹی سٹورز پر بھی عام مارکیٹ ریٹ پر اشیاء دستیاب ہوں گی۔ یوٹیلیٹی اسٹورز پر لوگوں کو 5 بنیادی اشیاء پر 25 فیصد تک سبسڈی مل رہی تھی۔ سبسڈی کی رقم اب بجلی کے بل میں ریلیف اور دیگر مقاصد پر خرچ کی جائے گی۔