تھانہ کٹھیالہ شیخاں کی حدود میں گاؤں جیہ میں پولیس چھاپے کے دوران فائرنگ سے ایس ایچ او قصوار عثمان اور کانسٹیبل نعمان زخمی ہو گئے۔
گاؤں جیہ میں اظہر پارٹی اور منظور پارٹی کے درمیان زمین کے تنازعے پر کشیدگی کافی عرصے سے جاری تھی، جو اب کئی فوجداری مقدمات تک جا پہنچی ہے۔ دونوں گروپوں کے خلاف متعدد ایف آئی آرز درج کی جا چکی ہیں، جن میں اقدامِ قتل، بدنیتی سے حملہ اور ہتھیاروں کے استعمال کی دفعات شامل ہیں۔
گزشتہ شب پولیس کو اظہر گروپ کے بعض جرائم پیشہ افراد کی موجودگی کی اطلاع ملی، جس پر ایس ایچ او تھانہ کٹھیالہ شیخاں قصوار عثمان نے نفری کے ہمراہ کارروائی کی۔ چھاپے کے دوران ملزمان نے پولیس پارٹی پر اندھا دھند فائرنگ کر دی، جس کے نتیجے میں ایس ایچ او کے کندھے اور کانسٹیبل نعمان کی ٹانگ پر گولیاں لگیں۔ دونوں زخمی اہلکاروں کو فوری طور پر ہسپتال منتقل کیا گیا ہے .
علاقے میں بھاری نفری تعینات کر دی ہے اور مقدمہ نمبر 491/25 زیر دفعات 324، 353، 186، 216، 148، 149 تعزیرات پاکستان اور 7-اے ٹی اے درج کر لیا گیا ہے۔ ابتدائی کارروائی میں ایک ملزم غلام محمد کو گرفتار بھی کر لیا گیا ہے، جبکہ دیگر کی گرفتاری کے لیے چھاپے جاری ہیں۔
واقعے میں ملوث عناصر کو قانون کے کٹہرے میں لایا جائے گا اور پولیس پر حملہ کرنے والوں سے سختی سے نمٹا جائے گا۔
