ڈپٹی کمشنر شاہد عمران مارتھ نے ترقیاتی سکیموں میں پیشرفت کے حوالے سے وڑیائیت روڑ، 28چک روڑ، کاکووال پل، بھیکھو موڑ تا قادرآباد روڑ اور سیال موڑروڈ کا دورہ کیا، اپنے دورے کے دوران انہوں نے مختلف منصوبوں کا تفصیلی جائزہ لیا ۔
منڈی بہاﺅالدین(ایم.بی.ڈین نیوز 09 فروری 2023 ) اس موقع پر ایڈیشنل ڈپٹی کمشنر فنانس حافظ غلام مرتضیٰ، ڈپٹی ڈائریکٹر لوکل گورنمنٹ آغا رضوان، ہائی وے کے افسران سمیت دیگر افسران بھی ہمراہ تھے۔ ڈپٹی کمشنر کو ایڈیشنل ڈپٹی کمشنر فنانس اور متعلقہ محکموں کے افسران نے جاری پراجیکٹس اور ترقیاتی سکیموں کے حوالے سے بریفنگ دی۔ ڈپٹی کمشنر نے ان ترقیاتی منصوبوں پر فزیکل اور فنانشل پراگرایس رپورٹس کا بھی معائنہ کیا۔
ڈپٹی کمشنر شاہد عمران مارتھ نے کہا کہ پنجاب حکومت کی اولین ترجیح عوام الناس کی فلاح وبہبود کیلئے کام کرنا ہے اور حکومت ترقیاتی سکیموں کیلئے ہر ممکن وسائل فراہم کر رہی ہے تا کہ مربوط ترقی کے خواب کی تعبیر کو پورا کیا جا سکے۔ انہوں نے ہدایت کی کہ ترقیاتی محکموں کے سربراہان جاری منصوبوں کے تمام پہلوﺅں پر کڑی نظر رکھیں۔ کام ٹھیکیداروں پر چھوڑنے کی بجائے افسران سکیموں کی خود نگرانی کریں۔ کوالٹی کے معیار پر کوئی سمجھوتہ نہ کیا جائے گا۔
انہوں نے کہاکہ ترقیاتی سکیموں میں کوالٹی، رفتار اور شفافیت پر خصوصی توجہ دی جائے اور عوام الناس کی فلاح وبہبود اور بنیادی سہولیات کی فراہمی کیلئے ان سکیموں کو تیزی سے مکمل کیا جائے۔ انہوں نے کہا کہ جاری منصوبوں کا گاہے بگاہے دورہ کرکے تمام ترقیاتی منصوبوں کا جائزہ لیتا رہوں گا ۔
بعد ازاں ڈپٹی کمشنر نے رورل ہیلتھ سنٹربھیکھو موڑ کا بھی اچانک دورہ کیا۔ اپنے دورے کے دوران انہوں نے طبی سہولیات کی فراہمی کا جائزہ لیا۔ انہوں نے ضروری ہدایات جاری کرتے ہوئے صفائی ستھرائی اور واش روم کی حالت زار کو بہتر بنانے کی ہدایت کی۔ ڈپٹی کمشنر نے کہا کہ پنجاب حکومت کی طرف سے ہیلتھ سیکٹر کوکروڑوں روپے کے بجٹ کی فراہمی کا مقصد صحت عامہ کی بہترین سہولتوں کی فراہمی کو یقینی بنانا ہے۔صحت عامہ کی سہولتوں اور بجٹ میں کئی گنا اضافے کے بعد سرکاری ہسپتالوں پر مریضوں کا اعتماد بڑھا ہے۔
انہوں نے کہا کہ ہسپتال میں مریضوں کے لئے تمام ضروری ادویات مفت موجود ہیں۔ کسی بھی شکایت کی صورت میں فوری ازالہ ہونا چاہیئے۔انہوں نے ہدایت کی کہ مریضوں کو علاج معالجے اور ادویات کی سہولیات کی فراہمی میں کوئی کوتاہی نہیں ہونی چاہئیے۔
