ملکوال منڈی بہاؤالدین براستہ ہریا اور آہلہ روڈ پر ٹریفک سائن بورڈز اور انتباہی نشانات نہ ہونے سے مسافروں کو شدید مشکلات کا سامنا ہے۔ خاص طور پر رات کے وقت سڑک کی سمت، خطرناک موڑ اور ندی کے کنارے راستے کو مزید خطرناک بنا دیتے ہیں۔
تحصیل ملکوال سے منڈی بہاؤالدین تک کی ان اہم سڑکوں پر نہ تو حد رفتار کے واضح بورڈ نصب ہیں اور نہ ہی موڑ، پلوں یا دیگر خطرناک جگہوں پر کوئی پیشگی نشانات ہیں، جس کی وجہ سے ڈرائیوروں کو دوران سفر مناسب رہنمائی نہیں ملتی۔
مقامی شہریوں اور راہگیروں کا کہنا ہے کہ اگر ڈرائیونگ لائسنس کے دوران سکھائے جانے والے ٹریفک سائنز کو عملی طور پر سڑکوں پر واضح طور پر نصب کر دیا جائے تو نہ صرف سفر محفوظ ہو سکتا ہے بلکہ حادثات کی تعداد میں بھی خاطر خواہ کمی واقع ہو سکتی ہے۔
شہریوں نے محکمہ ہائی وے سے پرزور مطالبہ کیا ہے کہ ملکوال تا منڈی بہاؤالدین سڑکوں پر ضروری ٹریفک سائن بورڈز، انتباہی نشانات اور ہدایتی نشانات فوری طور پر لگائے جائیں تاکہ شہریوں کے سفر کو محفوظ، آسان اور ممکنہ حادثات سے پاک بنایا جا سکے۔
