غلام رسول کمپنی کے ڈپٹی پراجیکٹ مینجر محمد عرفان نے بتایا ہے کہ پنجاب حکومت اور ایشین ڈویلپمنٹ بنک کے اشتراک سے جدید آب پاشی نظام کے تحت رسول بیراج پر بننے والی نئی نہر جلال پور کینال کا کام تکمیل کے آخری مراحل میں ہے۔جلد کسانوں کی زمینوں کو سیراب کرنے کیلئے پانی کو کھول دیا جائے گا۔
منڈی بہاوالدین ( ایم.بی.ڈین نیوز 28 اپریل 2025) انہوں نے بتایا کہ رسول بیراج پر دریائے جہلم سے نکلنے والی نہر کا پروجیکٹ سال 2019 میں شروع ہوا تھا، جو تکمیل کے آخری مراحل میں ہے۔ یہ نہر جلال پور شریف، پنڈ دادن خان اور للہ سے گزرتی ہوئی ضلع خوشاب تک کے ایک لاکھ 74 ہزار ایکڑ زرعی رقبہ سیراب کرے گی۔ جس سے ہزاروں کسان مستفید ہوں گے اور علاقے کی معیشت اور زرعی ترقی میں نئے باب کا اضافہ ہو گا۔
ڈپٹی پروجیکٹ منیجر نے بتایا کہ نہر کی کل لمبائی تقریباً 115 کلومیٹر ہے اور نہر میں پانی کا بہاؤ 1،350 کیوسک ہوگا، جو علاقے کی آبپاشی ضروریات کو پورا کرنے کے لیے موزوں ہو گا۔
ڈپٹی پروجیکٹ منیجر محمد عرفان کا کہنا تھا کہ جدید آبپاشی کے نظام کے تحت پانی کی مؤثر تقسیم اور زرعی پیداوار میں نمایاں اضافہ متوقع ہے اور خطے کی معیشت میں بھی نمایاں بہتری آئے گی۔ محمد عرفان نے امید ظاہر کی کہ رسول بیراج کینال پراجیکٹ علاقے کی معیشت اور کسانوں کی زندگیوں میں خوشگوار تبدیلی لے کر آئے گا۔
