اسلام آباد: نیشنل ڈیزاسٹر مینجمنٹ اتھارٹی (NDMA) NEOC نے پنجاب اور آزاد کشمیر کے مختلف اضلاع میں متوقع موسلادھار بارشوں کا الرٹ جاری کر دیا ہے۔
آئندہ 12 سے 24 گھنٹوں کے دوران گجرات، گوجرانوالہ، سیالکوٹ، نارووال، لاہور اور قصور سمیت پنجاب میں موسلادھار بارش کی پیشگوئی کی گئی ہے۔ اسی طرح جہلم، چکوال، منڈی بہاؤالدین، حافظ آباد، ننکانہ صاحب اور پاکپتن میں بھی بارش کا امکان ہے۔
آئندہ 12 سے 24 گھنٹوں کے دوران آزاد کشمیر کے وادی نیلم، باغ، کوٹلی، راولاکوٹ، مظفرآباد اور حویلیاں میں بھی وقفے وقفے سے بارش کا امکان ہے جس سے نشیبی علاقوں میں سیلاب اور پہاڑی نالوں میں لینڈ سلائیڈنگ کا خطرہ بڑھ سکتا ہے۔ پہاڑی نالوں میں پانی کا تیز بہاؤ سڑکوں پر ٹریفک کی روانی کو متاثر کر سکتا ہے۔
دریائے ستلج کے بہاؤ میں اضافے کے پیش نظر این ڈی ایم اے نے پہلے ہی الرٹ جاری کر دیا ہے اور متعلقہ اداروں نے ستلج کے نزدیکی علاقوں میں بڑے پیمانے پر انخلاء کی کارروائیاں شروع کر دی ہیں۔ پی ڈی ایم اے پنجاب، ریسکیو 1122 اور پاک فوج کے انجینئر سیلاب سے نمٹنے کے لیے امدادی کارروائیوں میں مصروف ہیں۔
عوام کو دریاؤں، نالوں اور نشیبی علاقوں سے دور رہنے کا مشورہ دیا گیا ہے۔ غیر ضروری سفر سے گریز کریں اور ٹی وی، ریڈیو، موبائل الرٹس اور این ڈی ایم اے کی ڈیزاسٹر الرٹ ایپ کے ذریعے جاری کردہ ہدایات پر سختی سے عمل کریں۔
