اسسٹنٹ ڈائریکٹر فشریز عاصمہ بانو نے کہا ہے کہ مچھلی لا تعداد خوبیوں کی وجہ سے انسانی صحت کیلئے موزوں ترین ہے جس میں بیماریوں سے لڑنے کی بے پناہ صلاحیت بھی موجود ہے، انہوں نے کہا کہ مچھلیوں کے تحفظ اور بہتر نشوونما کیلئے محکمہ فشریز پنجاب کی جانب سے بہترین اقدامات کئے جا رہے ہیں اور قدرتی پانیوں میں بچہ مچھلی کی سٹاکنگ جاری ہے۔
منڈی بہاﺅالدین ( ایم.بی.ڈین نیوز 30ستمبر 2022 ) ان خیالات کا اظہارانہوں نے رسول بیراج منڈی بہاوالدین میں مچھلی کی افزائش اور بچہ مچھلی چھوڑتے ہوئے کیا۔اسسٹنٹ ڈائریکٹر فشریز عاصمہ بانو نے کہا ہے کہ حکومت پنجاب کی ہدایات کے مطابق مچھلیوں کی زیادہ سے زیادہ افزائش کیلئے ہنگامی بنیادوں پر اقدامات کئے جا رہے ہیں.
دریاﺅں، جھیلوں اور دوسرے قدرتی پانیوں میں آبی حیات کی بحالی کےلیے بچہ مچھلی کی سٹاکنگ کی جارہی ہے جس سے مچھلی کی پیداوار میں اضافہ ہو گا۔ انہوں نے کہاکہ منڈی بہاوالدین میں فش فارمنگ کے فروغ اور فش فارمرز کو ارزاں نرخوں پر صحت مند بچہ مچھلی کی فراہمی کیلئے بہترین سروسز کی فراہمی کا آغاز کیا ہوا ہے۔
ضلع میں فش سیڈ کی پیداوار بڑھنے سے فش فارمرز کو گورنمنٹ ریٹس پر صحت مند بچہ مچھلی سپلائی کیلئے دستیاب ہو گا جس سے نا صرف مچھلی کی پیداوار میں اضافہ ہو گا بلکہ حکومتی ریونیو میں بھی اضافہ ہو گا۔