وزیر پرائمری اینڈ سیکنڈری ہیلتھ کیئر ڈاکٹر جمال ناصر نے کہا ہے کہ وزیر اعلیٰ محسن نقوی کی ہدایت پر پاکستان کی تاریخ میں پہلی بار ڈسٹرکٹ ہیڈ کوارٹر ہسپتالوں میں ڈاکٹروں کے لیے پوسٹ گریجویٹ کلاسز کا آغاز کیا جا رہا ہے۔
پاکستان کالج آف فزیشنز اینڈ سرجنز کے تعاون سے پانچ اضلاع اٹک، میانوالی، بھکر، منڈی بہاؤالدین اور جھنگ کے ڈسٹرکٹ ہیڈ کوارٹر ہسپتالوں میں ڈاکٹروں کی پوسٹ گریجویشن شروع کی جا رہی ہے۔
اس اقدام سے پسماندہ اضلاع کے لوگوں کو ماہر ڈاکٹروں کی خدمات دستیاب ہوں گی۔ محکمہ صحت پنجاب نے ہیماٹالوجی کو پیتھالوجی کا حصہ بنا دیا ہے۔ سنٹرل انڈکشن پالیسی کے تحت کلینکل ہیماتولوجی میں پوسٹ گریجویشن شروع کی جائے گی۔
وہ گزشتہ روز ملاقات کے لئے آئے ہوئے ینگ ڈاکٹرز ایسوسی ایشن کے وفد سے گفتگو کر رہے تھے۔ وفد میں ینگ ڈاکٹرز ایسوسی ایشن کے صدر شعیب نیازی اور دیگر ڈاکٹرز شامل تھے۔
