منڈی بہاؤالدین: محکمہ پاپولیشن ویلفیئر کے زیر اہتمام عالمی یوم آبادی کے حوالے سے سیمینار کا انعقاد، سی او ہیلتھ ڈاکٹر محمد الیاس گوندل اور ڈی او پاپولیشن غفران حسین ثاقب کا سیمینار سے خطاب، آگاہی واک بھی منعقد ہوئی
منڈی بہاؤالدین: چیف ایگزیکٹو آفیسر ہیلتھ ڈاکٹر محمد الیاس گوندل اور ڈسٹرکٹ آفیسر پاپولیشن غفران حسین ثاقب نے محکمہ بہبود آبادی کے زیر اہتمام عالمی یوم آبادی کے حوالے سے منعقدہ سیمینار سے خطاب کرتے ہوئے کہا ہے کہ حکومت آبادی میں بے ہنگم اضافہ کی روک تھام کیلئے اصلاحی و انتظامی اقدامات کر رہی ہے، کیونکہ وسائل اور آبادی کے توازن کو برقرار رکھ کر ہی ملکی ترقی ممکن ہو سکتی ہے۔
ان کا کہنا تھا کہ ماں اور بچے کی صحت کو برقرار رکھنے کیلئے بہبود آبادی کے اصولوں پر عمل کرنا ہو گا ۔ اسی حوالے سے محکمہ بہبود آبادی مذہبی حلقوں، تعلیمی اداروں، اور گاﺅں کی سطح پر سیمینار اور دیگر معلوماتی پروگرامز منعقد کرواتا ہے جس کے خاطر خواہ نتائج حاصل ہو رہے ہیں۔
ان کا کہنا تھا کہ ہر سال پاکستان کی آبادی میں 42 لاکھ کا اضافہ ہو رہا ہے ،پونے چار کروڑ آبادی والا ملک اب تقریبا 25 کروڑ آبادی تک پہنچ گیا ہے اور اگر آبادی کے مسئلے کو حل نہ کیا گیا تو 2047 تک ملک کی آبادی پچاس کروڑ سے زیادہ ہو جائے گی، جس سے ملک میں غربت، بے روزگاری اور افلاس بڑھے گی۔
انہوں نے کہا کہ ہمیں سنجیدگی سے بڑھتی ہوئی آبادی پر کنٹرول کرنا ہو گا اسی میں ہماری بقا ہے۔سیمینار کے اختتام پر افسران اور ملازمین میں شیلڈز اور تعریفی سرٹیفکیٹس بھی تقسیم کئے گئے۔ بعد ازاں آگاہی واک بھی منعقد ہوئی۔
