ڈپٹی کمشنر عثمان خالد خان ڈسٹرکٹ ایمرجنسی ریسپانس کمیٹی برائے انسداد ڈینگی کے حوالے سے منعقدہ اجلاس کی صدارت کرتے ہوئے کہا ہے کہ ڈینگی ایک کمیونٹی مرض ہے اس کے تدارک کیلئے تمام وسائل بروئے کار لائے جائیں اور اس سلسلے میں کوئی سمجھوتہ نہیں کیا جائے گا ۔
منڈی بہاوالدین( ایم.بی.ڈین نیوز 21 جون 2022) قبل ازیں سی ای او ہیلتھ ڈاکٹر محمد الیاس گوندل نے اجلاس کو ان ڈور، آﺅٹ ڈور ڈینگی سرویلنس، ڈینگی سپرے ، انسداد ڈینگی سے متعلق ادویات کے سٹاک، ڈینگی لاروا سائیٹس کے معائنہ کے حوالے سے بریفنگ دیتے ہوئے بتایا کہ ایک ہفتے (13سے 18جون) کی کاروائی کے دوران 518 ٹیموں نے ان ڈور 80 ہزار 775 گھروں کو چیک کیا گیا ہے جبکہ65 ٹیموں نے آﺅٹ ڈور 10ہزار110 گھروں کو چیک کیا۔
اسی طرح ان ڈور سرویلینس کے تحت 3 لاکھ 12 ہزار 361 کنٹینرز چیک کئے گئے جبکہ آﺅٹ ڈور سرویلینس کے تحت 38 ہزار 783 کنٹینرز چیک کئے گئے اور 4 مثبت لاروا برآمد ہونے پر کیمیکل لاروا سائیڈنگ کر دی گئی جبکہ ہاٹ سپاٹ کوریج سو فیصد رہی ۔انہوں نے بتایا کہ انسداد ڈینگی کے حوالے سے حفاظتی اقدامات نہ کرنے پر 554 نوٹسز بھی جاری کئے گئے ہیں۔
سی او ہیلتھ نے بتایا کہ پنجاب حکومت کی ہدایت کے مطابق 2 جولائی 2022 کو پنجاب بھر میں انسداد ڈینگی ڈے منایا جائے گا ۔ جس پر ڈپٹی کمشنر عثمان خالد خان نے سی او ہیلتھ کو ہدایت کی کہ ضلع بھر میں انسداد ڈینگی ڈے بھر پور طریقے سے منایا جائے اور عوام الناس میں آگاہی کیلئے ضلعی اور تحصیل سطح پر زیادہ سے زیادہ سیمینارز کا انعقاد کیا جائے جس میں تمام محکموں کی شرکت کو یقینی بنایا جائے۔
انہوں نے کہاکہ انسداد ڈینگی مہم پر سو فیصد عملدرآمد وقت کی اہم ضرورت ہے اور جسے ہم سب نے مل کراجتماعی کوششوں سے کامیاب بنانا ہے۔ نا صرف محکمہ صحت بلکہ دیگر متعلقہ محکمے اور عوام الناس مشترکہ کاوشوں سے انسداد ڈینگی کیلئے اپنا کردار ادا کریں۔
انہوں نے کہا کہ محکمہ صحت کی انسداد ڈینگی ٹیمیں ان ڈور ،آوٹ ڈور سرویلنس کے کام میں مزید بہتری لائیں کیونکہ منڈی بہاوالدین کو ڈینگی فری بناناضلعی انتظامیہ کی اولین ترجیح ہے۔ اجلاس میں سی ای او ہیلتھ ڈاکٹر محمد الیاس گوندل ، سی او ایجوکیشن محمد یاسین ورک، ڈی ایچ اوز ڈاکٹر افتخار، ڈاکٹر شکیل اقبال بٹ، ڈپٹی ڈی ایچ اوز، پی اے ٹو سی او ہیلتھ ارسلان رﺅف سمیت دیگر متعلقہ محکموں کے افسران بھی موجود تھے۔
