ڈپٹی کمشنر محمد شاہد نے کہا ہے کہ پولیو سے پاک پاکستان ہم سب کا اصل ہدف ہے، ضلع کے پولیو فری سٹیٹس کو برقرار رکھنے کے لئے ہر شخص اپنی ذمہ داری پوری کرے، انسداد پولیو مہم کے دوران کورونا ایس پیز پر سختی سے عملدرآمد کیا جائے۔
منڈی بہاوالدین( ایم.بی.ڈین نیوز 28فروری 2022 ) ان خیالات کا اظہار انہوں نے چلڈرن ہسپتال میں پانچ سال سے کم عمر کے بچوں کو پولیو ویکسین کے قطرے پلا کر پانچ روزہ انسدادِ پولیو مہم کا افتتاح کرتے ہوئے کیا۔اس موقع پر اسسٹنٹ کمشنر منڈی بہاﺅالدین کاشف جلیل، ڈسٹرکٹ ہیلتھ آفیسرز ڈاکٹر محمد افتخار، ڈاکٹر شکیل نذر، ایم ایس ڈی ایچ کیو ڈاکٹر قمر الزمان، ایم ایس چلڈرن ہسپتال اعجاز مغل ، فوکل پرسن برائے ای پی آئی/پولیورافعہ ناہید،صدر پی ایم اے طارق چدھڑ کے علاوہ دیگر افسران بھی موجود تھے۔
اس موقع پر ڈپٹی کمشنر محمد شاہد نے بتایا کہ ضلع منڈی بہاﺅالدین میں 28فروری سے04 مارچ 2022 تک جاری رہنے والے انسداد پولیو میں پانچ سال تک کی عمر کے 2 لاکھ32 ہزار73 بچوں کو پولیو ویکسین کے قطرے پلائے جائیں گے۔ جس کیلئے 2،333 ورکرز پر مشتمل محکمہ صحت کی 70 فکسڈ ٹیمیں، 43 ٹرانزٹ پوائنٹس، گھر گھر جانے والی957 ٹیمیں ،70 یوسی ایم اوز جبکہ 193 ایریا انچارج مقرر کئے گئے ہیں۔
ڈپٹی کمشنر نے کہا کہ وزیراعلیٰ پنجاب سردار عثمان بزدار کی ہدایت کے مطابق ضلع میں پولیو کے خلاف قومی مہم کو جذبہ حب الوطنی کے تحت مکمل کیا جائے گا۔ انہوں نے کہاکہ انسداد پولیو مہم کی کامیابی ہم سب کی مشترکہ ذمہ داری ہے، معاشرے کے ہر طبقے کے والدین کا فرض ہے کہ وہ اپنے بچوں کو عمر بھر کی معذوری سے بچانے کیلئے پولیو ویکسین کے قطرے پلانے کیلئے محکمہ صحت کی ٹیموں سے تعاون کریں تاکہ ہم اپنی آنے والی نسلوں کو اس خطرناک اور موذی مرض سے محفوظ رکھ سکیں۔
انہوں نے محکمہ صحت کے افسران کو واضح ہدایات جاری کرتے ہوئے کہا کہ پولیو ٹیمیں انسداد پولیو مہم کے دوران کورونا ایس او پیز کا مکمل خیال رکھتے ہوئے ماسک پہنیں اور سینی ٹائزر لگائیں ۔انہوں نے محکمہ صحت کے افسران کو ہدایت کی کہ وہ انسداد پولیو مہم کے دوران ٹیموں کی کارکردگی کی خود مانیٹرنگ کریں اور قطرے پلانے والی ٹیموں کی روزانہ کی بنیاد پر سکریننگ کی جائے.
انہوں نے کہا کہ اس بات کو یقینی بنایا جائے کہ کوئی علاقہ ایسا نہ رہے جہاں پولیو ٹیم نہ پہنچی ہو اور نہ ہی کوئی بچہ پولیو ویکسین کے قطرے پلائے جانے سے محروم رہے۔ بعد ازاں ڈپٹی کمشنر کی سربراہی میں چلڈرن ہسپتال سے پرانا تھانہ روڈ تک آگاہی واک بھی منعقد کی گئی۔
