ایڈیشنل ڈپٹی کمشنر جنرل محمد شفیق نے کہا ہے کہ تمام محکمے شہریوں کو ڈینگی سے محفوظ رکھنے کیلئے ذمہ داری سے کام کریں، حکومتی اقدامات کے بعد عام آدمی میں ڈینگی سے آگاہی میں کافی اضافہ ہوا ہے تاہم پھر بھی کوئی رسک نہیں لیا جاسکتا۔ انہوں نے کہاکہ عوامی تعاون کے بغیر ڈینگی سے بچاﺅ ممکن نہیں لہذا ڈینگی ٹیمیں گھر گھر جا کر ڈینگی سے بچاﺅ کیلئے احتیاطی تدابیر سے آگاہی دیں۔
منڈی بہاﺅالدین ( ایم.بی.ڈین نیوز 07 فروری 2022) ان خیالات کا اظہار انہوں نے آج یہاں ڈی سی آفس میں ڈسٹرکٹ ایمرجنسی ریسپانس کمیٹی برائے انسداد ڈینگی کے حوالے سے منعقدہ اجلاس کی صدارت کرتے ہوئے کیا۔ اجلاس میں سی ای او ہیلتھ ڈاکٹر محمد الیاس گوندل، ڈسٹرکٹ ہیلتھ آفیسر ڈاکٹر محمد افتخار، ڈپٹی ڈائریکٹر سوشل ویلفیئر عاطف علی وڑائچ،ڈپٹی ڈی ایچ اوز ڈاکٹر خالد عباسی،ڈاکٹر فرخ محمود، میڈیکل سپرنٹنڈنٹس منڈی بہاﺅالدین ڈاکٹر قمر الزمان،ملکوال ڈاکٹر ناصر وقار، پی اے ٹو سی او ہیلتھ ارسلان رﺅف اور دیگر متعلقہ محکموں کے افسران بھی موجود تھے۔
قبل ازیں سی او ہیلتھ ڈاکٹر محمد الیاس گوندل نے اجلاس کو ان ڈور، آﺅٹ ڈور ڈینگی سرویلنس،ڈینگی سپرے ، انسداد ڈینگی سے متعلق ادویات کے سٹاک،ڈینگی لاروا سائیٹس کے معائنہ کے حوالے سے بریفنگ دیتے ہوئے بتایا کہ 31 جنوری سے 05فروری تک (ایک ہفتے )کے دوران 518 ٹیموں نے ان ڈور75 ہزار650 گھروں کو چیک کیا گیا ہے جبکہ65 ٹیموں نے آﺅٹ ڈور9 ہزار60 گھروں کو چیک کیا۔
اسی طرح ان ڈور سرویلینس کے تحت3 لاکھ73 ہزار231 کنٹینرز چیک کئے گئے جبکہ آﺅٹ ڈور سرویلینس کے تحت31 ہزار69 کنٹینرز چیک کئے گئے اور ہاٹ سپاٹ کوریج 100 فیصد رہی۔سی او ہیلتھ نے بتایا کہ انسداد ڈینگی ایس او پیز پر عمل نہ کرنے اورحفاظتی اقدامات نہ کرنے پر62 نوٹسز بھی جاری کئے گئے ہیں ۔ جس پر ایڈیشنل ڈپٹی کمشنرمحمد شفیق نے کہا کہ منڈی بہاﺅالدین کو ڈینگی فری بناناضلعی انتظامیہ کی اولین ترجیح ہے، محکمہ صحت کی انسداد ڈینگی ٹیمیں ان ڈور، آوٹ ڈور سرویلنس کے کام میں مزید بہتری لائیں۔
انہوں نے محکمہ صحت اور دیگر افسران خصوصاًفیلڈ ٹیموں پر زور دیا کہ وہ قبرستانوں، ٹائر شاپس، کباڑخانوں، گملوں اور سروس سٹیشنز سمیت دیگر ہاٹ سپاٹ جگہوں کو مسلسل چیک کریں اور روزانہ کی سرگرمیوں کو اینڈرائیڈ موبائل کے ذریعے ڈیش بورڈ پر اپ لوڈ کریں۔ انہوں نے افسران کو ہدایت کی کہ شہریوں میں انسداد ڈینگی کے حوالے سے آگاہی مہم تیز کی جائے اور عوام الناس کو آگاہ کیا جائے کہ وہ اپنے گردونوح کو صاف ستھرا رکھیں اور احتیاطی تدابیر اختیار کریں تاکہ ڈینگی مچھر کی افزائش کو روکا جا سکے۔محمد شفیق نے کہاکہ انسداد ڈینگی سرگرمیوں میں کسی قسم کی سستی اور غفلت ہر گز برداشت نہیں کی جائے گی۔
