ڈپٹی کمشنر محمد شاہد نے کہا ہے کہ وزیراعظم عمران خان اور وزیراعلیٰ پنجاب سردار عثمان بزدار کی واضح ہدایات کی روشنی میں اشیائے خوردونوش کی قیمتوں میں استحکام کو سو فیصد یقینی بنایا جا رہا ہے، انجمن تاجران و کریانہ مرچنٹس ضلعی انتظامیہ کے ساتھ مل کر حکومت کی جانب سے اشیاءخوردونوش کی قیمتوں کو موثر بنانے کیلئے اپنا تعاون اور کلیدی کردار ادا کریں۔
منڈی بہاﺅالدین( ایم.بی.ڈین نیوز 11جنوری 2022) ان خیالات کا اظہار انہوں نے ڈپٹی کمشنر آفس میں ڈسٹرکٹ پرائس کنٹرول کمیٹی کے اجلاس میں انجمن تاجران و کریانہ مرچنٹس کے نمائندگان کے ساتھ اشیائے خوردونوش کی قیمتوں کا تعین کرنے کے حوالے سے منعقدہ جائزہ اجلاس کی صدارت کرتے ہوئے کیا۔ اجلاس میں ایڈیشنل ڈائریکٹر لائیو سٹاک ڈاکٹر محمد ممتاز بیگ، ڈی او انڈسٹریز و فوکل پرسن رانا محمد سعید، انسپکٹر محمد بلال، سیکرٹری مارکیٹ کمیٹی، انجمن تاجران و کریانہ مرچنٹس کے عہدیداروں سمیت دیگر متعلقہ محکموں کے افسران بھی شریک تھے۔
قبل ازیں ڈی او انڈسٹریز محمد سعید نے اجلاس کو مختلف اضلاع میں موجودہ اشیاءخوردونوش کی قیمتوں کے حوالے سے بریفنگ دی۔جس پر ڈپٹی کمشنر نے تاجران اور متعلقہ افسران کے ساتھ غوروخوص کے بعد متفقہ طور پراشیائے خوردونوش کی قیمتیں مارکیٹس کے جائزے کے بعد مقرر کر دیں۔
جس کے مطابق آٹا 20 کلو بیگ 1100 روپے جبکہ 10 کلو بیگ 550 روپے، باسمتی سپر کرنل نیا120 روپے کلو، باسمتی سپر کرنل پرانا130 روپے کلو، دال چناموٹی145 روپے، دال چنا باریک140 روپے، دال ماش دھلی255 روپے، دال ماش چھلکا والی225 روپے کلو ، دال مونگ دھلی ہوئی 135روپے کلو، دال مسور موٹی200 روپے، دال مسور باریک 205 روپے، بیسن 144 روپے کلو، سفید چنا موٹا200 روپے،سفید چنا باریک180 روپے، کالا چنا135 روپے، چینی 90 روپے فی کلو گرام پر دستیاب ہوں گے ۔
چھوٹا گوشت 900 روپے کلو جبکہ بڑا گوشت 450کلو پر دستیاب ہوگا۔ اسی طرح دودھ 90 روپے لیٹر اور دہی 100 فی کلو گرام پر دستیاب ہوں گے۔ تندوری روٹی100 گرام 7 روپے فی عدد، نان 12 روپے فی عدد پر دستیاب ہونگے جبکہ بقیہ اشیائے خوردونوش کی قیمتیں پہلی قیمت پر ہی برقرار رکھنے کا فیصلہ کیا گیا۔سبزیوں، فروٹ ، انڈے ، برائلر گوشت مارکیٹ کمیٹی روزنامہ کی بنیاد پر مقرر کرے گی۔
ڈپٹی کمشنر محمد شاہد نے کہا کہ حکومت ضروری اشیاءخوردونوش،پھلوں ، سبزیوں کی قیمتوں میں استحکام لانے کیلئے پوری طرح سنجیدہ ہے اورموجودہ حالات میں عوام الناس کو ریلیف پہنچانے کیلئے تمام وسائل بروئے کار لا رہی ہے۔ انہوں نے ہدایت کی کہ کسی غریب اور چھوٹے دکاندار کو ناجائز تنگ نہ کیا جائے بلکہ صریحاََ خلاف ورزی کے مرتکب افراد کے خلاف کاروائی کی جائے۔
انہوں نے وارننگ جاری کرتے ہوئے کہاکہ اشیائے خوردونوش میں ملاوٹ کسی صورت برداشت نہ کی جائے گی بلکہ ایسے عناصر کے خلاف ایکشن لیتے ہوئے انہیں بھاری جرمانوں کے علاوہ جیل کی سزا بھی دی جائے گی۔
