حکومت کا ن لیگ کا گڑھ سمجھے جانے والے حلقوں میں میگا پراجیکٹس شروع کرنے کا فیصلہ. تحریک انصاف کی حکومت نے پنجاب میں اپوزیشن جماعت ن لیگ کا مقابلہ کرنے کے لیے بڑا منصوبہ تشکیل دے دیا ہے جس کے مطابق ن لیگ کا گڑھ سمجھے جانے والے حلقوں میں حکومت اربوں روپے کے میگا پراجیکٹس شروع کرنے جا رہی ہے۔
منڈی بہاءالدین (ایم.بی.ڈین نیوز 23 دسمبر 2021) ذرائع کے مطابق حکومت نے پنجاب میں ن لیگ کے گڑھ میں بڑا ترقیاتی پیکیج دے دیا ہے، ان ترقیاتی منصوبوں کی منظوری13 دسمبر کو لاہور اجلاس میں دی گئی، اجلاس کی صدارت وزیراعظم عمران خان نے کی تھی۔ ذرائع کا کہنا ہے کہ مجموعی طور پر 76 منصوبوں کی منظوری دی گئی ہے، جن میں یونیورسٹیاں، بڑی سڑکیں، فلائی اوورز، اسپورٹس، زراعت اور انڈسٹریل اسٹیٹ قابل ذکر ہیں، گوجرانوالہ، گجرات، سیالکوٹ، نارووال اور منڈی بہاؤالدین کو منصوبے دیئے گئے ہیں۔
ذرائع کا کہنا ہے کہ وزیراعظم کی جانب سے گوجرانوالہ ڈویژن کے لیے125ارب کے ترقیاتی پیکیج کی منظوری دی گئی ہے، سب سےزیادہ71 ارب روپےسڑکوں اورفلائی اوورز کی تعمیر پر لگیں گے، 26ارب روپے کی لاگت سے4 یونیورسٹیاں تعمیر کی جائینگی، یہ یونیورسٹیاں سمبڑیال، منڈی بہاؤالدین، حافظ آباد، گوجرانوالہ میں تعمیر کی جائیں گی۔
ذرائع کے مطابق منڈی بہاؤالدین سےسرائےعالمگیر روڈ پر 10 ارب روپے لگیں گے، جلالپور جٹاں سےگجرات روڈپر2 ارب روپےلاگت آئےگی اسی طرح کھاریاں ڈنگہ روڈپربھی 2 ارب خرچ ہوں گے جبکہ سیالکوٹ رنگ روڈپر15 ارب روپے خرچ ہوں گے۔ ذرائع کا کہنا ہے کہ شیخوپورہ سے گوجرانوالہ روڈ پر5 ارب، مرید کےنارووال روڈ پرڈیڑھ ارب خرچ ہوگا جبکہ وزیرآباد ڈسکہ روڈپر فلائی اوور70 کروڑ کی لاگت سےتعمیرہوگا، نیو انڈسٹریل اسٹیٹ گجرات پر ایک ارب30 کروڑلگیں گے۔
ذرائع کے مطابق چاول کی پیداوار بڑھانےپر1 ارب89 کروڑ خرچ ہونگے، گندم پر ایک ارب 10 کروڑ، سرجیکل سٹی سیالکوٹ پرایک ارب 70 کروڑ، ہائی پرفارمنس کرکٹ اکیڈمی سیالکوٹ پر50 کروڑلگیں گے۔ ذرائع کا مزید کہنا تھا کہ بیشتر ترقیاتی منصوبے 2023 اور چند آئندہ سال میں مکمل ہوں گے۔ واضح رہے کہ ان اضلاع میں پی ٹی آئی کے3، ق لیگ کے2 اور ن لیگ کے15 ایم این ایزہیں، لاہور میں ہونیوالے اجلاس کی تفصیلات اور تصاویر جاری نہیں کی گئی تھیں.
