منڈی بہاﺅلدین( ایم.بی.ڈین نیوز 18 دسمبر 2021)ممبر قومی اسمبلی حاجی امتیاز احمد چوہدری اور ڈپٹی کمشنر ڈاکٹر احسان الحق ضیاء کی زیر صدارت ڈی سی آفس میں ڈسٹرکٹ ہیلتھ کونسل کا اجلاس منعقد ہوا۔ اجلاس میں ممبر صوبائی اسمبلی گلریز افضل چن ، ایڈیشنل ڈپٹی کمشنر فنانس حافظ غلام مرتضیٰ، سی ای او ہیلتھ ڈاکٹر محمد الیاس گوندل، ڈسٹرکٹ ہیلتھ آفیسر ڈاکٹر افتخار، ڈاکٹر شکیل اقبال بٹ، ڈی او بلڈنگ قرار شاہ، میڈیکل سپرنٹنڈنٹ منڈی بہاﺅالدین ڈاکٹر قمرالزمان اور دیگر متعلقہ محکموں کے افسران نے شرکت کی۔
اجلاس میں سٹاف اور ڈیٹا اینٹری آپریٹر کی تنخواہوں کی ادائیگی ،کوویڈ ریڈ کمپین میں کام کرنے والے ورکرز کی ٹرانسپورٹیشن اور کمیونیکیشن کیلئے فنڈز کی فراہمی اور دیگر طبی سہولتوں کی فراہمی اور کارکردگی کے حوالے سے امور زیر بحث آئے۔ جس پر ممبر قومی اسمبلی ، ڈپٹی کمشنر اور ممبر صوبائی اسمبلی نے شرکاء اجلاس کی متفقہ رائے کے بعد سٹاف اور ڈیٹا اینٹری آپریٹر کی تنخواہوں کی ادائیگی ،کوویڈ ریڈ کمپین کیلئے فنڈز کی فراہمی اور دیگر طبی سہولتوں کی فراہمی کے حوالے سے منظوری دے دی۔
اس موقع پر ممبر قومی اسمبلی حاجی امتیاز احمد چوہدری نے کہا کہ صحت عامہ کی سہولیات کی فراہمی حکومت پنجاب کی اولین ترجیحات میں شامل ہے اورکروڑوں روپے کے بجٹ کی فراہمی کا مقصد شہریوں کو صحت عامہ کی بہترین سہولتوں کی فراہمی کو یقینی بنانا ہے ۔ ڈپٹی کمشنر ڈاکٹر احسان الحق ضیاءنے کہاکہ صحت عامہ کا شعبہ ضلعی انتظامیہ کی اولین ترجیحات میں شامل ہے ،صحت عامہ کی سہولتوں میں کئی گنا اضافے کے بعد سرکاری ہسپتالوں پر مریضوں کا اعتماد بڑھا ہے۔ضرورت اس امر کی ہے کہ محکمہ صحت عوام الناس کی فلاح و بہبود کیلئے بھر پور دلچسپی لیتے ہوئے حکومتی پالیسیوں کا کامیاب بنائیں۔
ممبر صوبائی اسمبلی گلریز افضل چن نے کہاکہ وزیر اعلیٰ پنجاب کی ہدایت پر تمام ہسپتالوں میں عدم سہولیات کی فراہمی کو یقینی بنانے کے ساتھ ساتھ اپ گریڈ بھی کیا جا رہا ہے۔ اس مقصد کیلئے صوبائی حکومت ہر ممکن وسائل اور فنڈز مہیا کر رہی ہے۔حکومت پنجاب کی جانب سے اربوں روپے کے بجٹ کی فراہمی کا مقصد شہریوں کو صحت عامہ کی بہترین سہولیات کی فراہمی کو یقینی بنانا ہے ۔
