منڈی بہاﺅلدین ( ایم.بی.ڈین نیوز 14 دسمبر 2021 ) ڈپٹی کمشنر ڈاکٹر احسان الحق ضیاءنے علی الصبح شہر کی سبزی و پھل منڈی کا اچانک دورہ کیا، انہوں نے سبزی فروٹ منڈی میں سبزی وپھل کے معیار کو چیک کیا اور بولی اور قیمتوں کا تفصیلی جائزہ لیا۔ انہوں نے مختلف دکانوں اور گوداموں کا معائنہ کرکے اپنی نگرانی میں سبزیوں اور پھلوں کی حکومت کے مقرر کردہ نرخوں پر نیلامی کروائی۔
انہوں نے خریداری کیلئے آنے والے دکانداروں اور صارفین سے اشیاءکی قیمتوں اور کوالٹی سے متعلق استفسار بھی کیا جس پر وہاں موجود صارفین نے اپنے اطمینان کا اظہار کیا۔ اس موقع پر ڈپٹی کمشنر نے کہاکہ منڈی سے مارکیٹ تک سبزی و پھل کی قیمتوں کو اعتدال پر رکھنا ضلعی انتظامیہ کی اولین ترجیح ہے، وزیراعلیٰ پنجاب سردار عثمان بزدار کی ہدایت پر عوام الناس کو براہ راست ریلیف پہنچانے کیلئے سبزیوں و پھلوں کی قیمتوں کو کنٹرول کیا جا رہا ہے اورمنڈی میں نیلامی کے عمل کی مسلسل مانیٹرنگ کی جا رہی ہے.
یہی وجہ ہے کہ سبزیوں اور پھلوں کی قیمتوں میں استحکام کو برقرار رکھ کر مقرر کردہ نرخوں پرعملدرآمد کروایا جا رہا ہے جس کے ثمرات عوام تک پہنچ رہے ہیں۔ انہوں نے آڑھتیوں اور نیلامی کے ممبران پر واضح کیا کہ صارفین کے حقوق کا خیال کرتے ہوئے عوام کی قوت خرید کے مطابق مقرر کردہ ریٹس پر ہی پھل اور سبزیاں فروخت کریں بصورت دیگر ناجائز منافع خوری پر سزا بھگتنا پڑے گی۔
انہوں نے پرائس مجسٹریٹس کو ہدایت کی کہ مارکیٹ میں سرکاری نرخوں پر سبزیوں اور پھلوں کی دستیابی کو یقینی بنائیں اور گراں فروشی میں ملوث عناصر کے خلاف جرمانوں سمیت ایف آئی آرز درج کرائیں۔ انہوں نے شہریوں سے اپیل کی کہ وہ اشیاءکی خریداری کرتے ہوئے مارکیٹ کمیٹی سے جاری کردہ ریٹ لسٹ کو فالو کریں، زائد قیمت ہر گز ادا نہ کریںاورکسی بھی شکایت کی صورت میں ” قیمت ایپ”یا ٹول فری نمبر 0800-02345 پر اطلاع دیں۔
