صوبائی سیکریٹری انڈسٹریز اینڈ سکل ڈویلپمنٹ پنجاب احسان بھٹہ نے وائس چانسلر پنجاب یونیورسٹی آف ٹیکنالوجی رسول منڈی بہاؤالدین ڈاکٹر رؤف اعظم کے ہمراہ گورنمنٹ پنجاب یونیورسٹی آف ٹیکنالوجی رسول منڈی بہاؤالدین کا دورہ کیا، اور 6 ارب روپے کی لاگت سے تعمیر ہونے والے نئے کیمپس کے مختلف حصوں کا معائنہ کیا۔
اس موقع پر بریفنگ کے دوران انھیں بتایا گیا کہ پراجیکٹ پر کام کو 6 گروپوں میں تقسیم کیا گیا ہے جس میں اکیڈمک بلاک، ایڈمن بلاک، عملے/ افسران کے لیے رہائشی علاقہ، طلبہ کے لیے ہاسٹل، لائبریری اور طلبہ کی سروسز کے علاقے شامل ہیں ،صوبائی سیکریٹری نے پراجیکٹ ڈائریکٹر اور ایکسئین بلڈنگ ڈیپارٹمنٹ کو ہدایات جاری کرتے ہوئے کہا کہ ایڈمن اور اکیڈمک بلاکس کی تعمیر ترجیح بنیادوں پر دسمبر 2023 تک مکمل کی جائے ،
صوبائی سیکریٹری نے کہا کہ لیبر میں اضافہ کر کے 2 شفٹوں میں کام کروائیں تاکہ کلاسز کو جلد از جلد نئے اکیڈمک بلاکس میں منتقل کیا جا سکے۔ انھوں نے وائس چانسلر اور پراجیکٹ ڈائریکٹر کو آلات کے ڈیزائن کو مکمل کرنے کی ہدایت کی تاکہ اکیڈمک بلاکس کو جلد از جلد مکمل کیا جا سکے۔
انھوں نے شجرکاری اور بیرونی جانب بحالی شروع کرنے کے ساتھ تمام سرگرمیوں کی ٹائم لائنز کے ساتھ ماہانہ ڈبلیو بی ایس اور بار شیڈول جمع کرانے کی ہدایت بھی کی تاکہ کنسلٹنٹ اور پی ایم یو اس کی نگرانی کریں اور ماہانہ بنیادوں پر محکمہ کو رپورٹ پیش کریں۔