پنجاب کے دارالحکومت لاہور، اس کے نواحی اضلاع اور بلوچستان کے کچھ حصوں میں مون سون کی موسلادھار بارشوں نے تباہی مچا دی ہے۔ بارشوں کے باعث کئی علاقوں میں شدید سیلاب اور معمولات زندگی درہم برہم ہو گئے ہیں۔ کم از کم 11 افراد اپنی جانوں سے ہاتھ دھو بیٹھے ہیں جبکہ متعدد زخمی ہوئے ہیں۔
واسا کے مون سون کنٹرول روم کے اعداد و شمار کے مطابق لاہور میں اوسطاً 58.8 ملی میٹر بارش ریکارڈ کی گئی، سب سے زیادہ بارش نشتر ٹاؤن میں 84 ملی میٹر، لکشمی چوک میں 78 ملی میٹر اور پانی والا تالاب میں 74 ملی میٹر ریکارڈ کی گئی۔
گزشتہ 24 گھنٹوں کے دوران پنجاب کے کئی دیگر اضلاع میں بھی بارش ہوئی۔ خانیوال میں 51 ملی میٹر، راولپنڈی میں 42، ساہیوال میں 44، مری میں 41، اوکاڑہ میں 30، منڈی بہاؤالدین میں 27، منگلا میں 24 اور ٹوبہ ٹیک سنگھ میں 13 ملی میٹر بارش ریکارڈ کی گئی۔
گوجرانوالہ، بہاولپور، گجرات، قصور، بہاولنگر، سرگودھا، ملتان اور جھنگ میں بھی بارش ہوئی۔ پنجاب ڈیزاسٹر مینجمنٹ اتھارٹی (پی ڈی ایم اے) کے ڈائریکٹر جنرل عرفان علی کاٹھیا نے کہا کہ بارشوں کا سلسلہ 13 جولائی تک جاری رہنے کا امکان ہے۔
جمعرات کو جہلم، منڈی بہاؤالدین، سیالکوٹ، نارووال، گجرات، لاہور اور حافظ آباد میں گرج چمک کے ساتھ بارش کا امکان ہے۔ پنجاب حکومت نے دریاؤں اور نہروں کے گرد دفعہ 144 نافذ کر دی ہے۔
