وزیراعلیٰ پنجاب چوہدری پرویزالٰہی کی خصوصی ہدایت پر ڈپٹی کمشنر تسنیم علی خاں نے عوام الناس کو فوری ایمرجنسی سروسز کی فراہمی کیلئے ریسکیو 1122 کی موبائل ایمبولینس موٹر سائیکل سروس کا افتتاح کر دیا، یہ موٹر سائیکل موبائل سروس شہریوں کو گھر کی دہلیز پر مفت علاج معالجہ اور ریسکیو کی جدید سروس فراہم کرے گی ۔ یہ سروس شہر اور اس کے گردونواح میں دستیاب ہو گی ۔
منڈی بہاﺅالدین ( ایم.بی.ڈین نیوز 29ستمبر 2022) ان خیالات کا اظہار ڈپٹی کمشنر تسنیم علی خاں نے ریسکیو 1122 آفس میں ایمرجنسی موبائل موٹر سائیکل سروس کی چابیاں دینے کی افتتاحی تقریب سے خطاب کرتے ہوئے کیا۔ اس موقع پر ڈسٹرکٹ ایمرجنسی آفیسر انجینئر عمران خان ،سٹیشن کوآرڈینیٹر سہیل خان، میڈیا کوآرڈینیٹر عاطف رفیق، ریسکیو سٹاف اور دیگر بھی موجود تھے۔
ڈسٹرکٹ ایمرجنسی آفیسر عمران خان نے ڈپٹی کمشنر کو ریسکیو 1122 کی کارکردگی اور ایمرجنسی حالات میں استعمال ہونے والے طبی و دیگر آلات کے استعمال کے حوالے سے تفصیلی بریفنگ دی ۔ڈسٹرکٹ ایمرجنسی آفیسر نے ڈپٹی کمشنر کو کنٹرول روم کا معائنہ کرایا۔ ڈسٹرکٹ ایمرجنسی آفیسرنے بتایا کہ 26 ایمرجنسی موبائل موٹرسائیکل کی سروس مہیا کی جا رہی ہے جس کیلئے ایمرجنسی کے ماہر ریسکیو اہلکاروں کو تعینات کیا گیا ہے، یہ سروس حکومت پنجاب کی جانب سے شہریوں کو گھر کی دہلیز پر فراہم کی جائے گی تاکہ شہریوں کی جان و مال کو زیادہ سے زیادہ بر وقت تحفظ فراہم کیا جاسکے۔
اس موقع پر ڈپٹی کمشنرنے کہاکہ حکومت عوام الناس کو کسی بھی قسم کے ایمرجنسی حالات میں ان کے جان مال کے تحفظ کو یقینی بنانے کیلئے جدید خطوط پر استوار کر رہی ہے اور اس کیلئے وہ تمام اقدامات اٹھائے جا رہے ہیں جس سے شہریوں کو ریسکیو، علاج معالجہ اور دیگر سہولیات میسر آ سکیں۔ انہوں نے ریسکیورز کے کام کی تعریف کرتے ہوئے مستقبل میں بھی اسی طرح جانفشانی سے کام سر انجام دینے کی ہدایت کی۔
