اسلام آباد: تحریک انصاف کے بانی اور سابق چیئرمین عمران خان نے الیکشن کمیشن کی جانب سے 5 سال کے لیے نااہل قرار دینے کے فیصلے کو لاہور ہائی کورٹ میں چیلنج کردیا۔
نیوز کے مطابق سابق چیئرمین عمران خان نے بیرسٹر گوہر اور علی ظفر کی ثالثی سے لاہور ہائیکورٹ میں درخواست دائر کی ہے جس میں الیکشن کمیشن کو فریق بنایا گیا ہے۔
عمران خان نے درخواست میں کہا ہے کہ الیکشن کمیشن نے انہیں 8 اگست 2023 کو 5 سال کے لیے بطور رکن اسمبلی نااہل قرار دیا، الیکشن کمیشن نے درخواست گزار کو الیکشن سے نااہل کرنے کے لیے غیر قانونی اقدام کیا۔
درخواست میں کہا گیا ہے کہ الیکشن کی تاریخ کا اعلان سپریم کورٹ کے حکم پر کیا گیا، درخواست گزار الیکشن میں حصہ لینا چاہتا ہے۔ درخواست گزار پر لگائے گئے الزامات بے بنیاد ہیں۔
عمران خان نے استدعا کی ہے کہ عدالت مجھے پانچ سال کے لیے نااہل قرار دینے کے الیکشن کمیشن کے فیصلے کو کالعدم قرار دے۔ اس درخواست کے حتمی فیصلے تک نااہلی کا نوٹیفکیشن معطل کیا جائے۔
