ڈسٹرکٹ ریٹرننگ آفیسر شاہد عمران مارتھ کی زیر نگرانی ڈسٹرکٹ مانیٹرنگ آفیسر شیخ محمد اقبال نے الیکشن کے ضابطہ اخلاق کی خلاف ورزی پر ایکشن لیتے ہوئے الیکشن مہم کے پوسٹرز اور پینا فلیکسز اتروا دئیے۔
منڈی بہاوالدین( ایم.بی.ڈین نیوز 03 جنوری 2024) ڈسٹرکٹ مانیٹرنگ آفیسر نے بتایا کہ الیکشن کمیشن آف پاکستان نے امیدواروں کیلئے ضابطہ اخلاق برائے جنرل الیکشن 2024 جاری کر دیا ہے ، جس کے تحت مطلوبہ سائز میں الیکشن بینر، پوسٹر اور پمفلٹ کی اجازت ہے۔
انہوں نے بتایا کہ مانیٹرنگ آفیسر آنے والے دنوں میں روزانہ کی بنیاد پر ہر حلقہ میں نگرانی کریں گے ۔ اس موقع پر ڈسٹرکٹ ریٹرننگ آفیسر /ڈپٹی کمشنر شاہد عمران مارتھ کا کہنا تھا کہ 8 فروری 2024 کو ہونے والے عام انتخابات میں الیکشن کمیشن آف پاکستان کے احکامات اور ضابطہ اخلاق برائے امیدواران کو ہر صورت یقینی بنایا جائے گا اور خلاف ورزی پر قانونی چارہ جوئی کی جائے گی اور کسی کے ساتھ کوئی رو رعائت نہ برتی جائے گی۔
یاد رہے کہ الیکشن کمیشن آف پاکستان نے ہر حلقہ میں دو مانیٹرنگ آفیسر تعینات کر دئیے ہیں جو الیکشن مہم کی تمام کاروائی کی موثر نگرانی کریں گے اور ڈسٹرکٹ مانیٹرنگ آفیسر اور ڈسٹرکٹ ریٹرننگ آفیسر کو اپنی رپورٹ پیش کریں گے ۔