ڈپٹی کمشنر تسنیم علی خاں نے علی الصبح سبزی وپھل منڈی کا دورہ کیا اور اپنی نگرانی میں سبزیوں و پھلوں کی نیلامی کے عمل کا جائزہ لیا۔ انہوں نے مختلف آڑھتوں پر جا کر اپنی نگرانی میں پھلوں اور سبزیوں کی حکومت کے مقرر کردہ نرخوں پر نیلامی کروائی۔
منڈی بہاﺅالدین( ایم.بی.ڈین نیوز 31 اگست2022) انہوں نے آڑھتی حضرات کو ہدایت کی کہ وہ مارکیٹ کمیٹی کی جانب سے طے شدہ قیمتیں ہی وصول کریں بصورت دیگر ذخیرہ اندوزوں اور ناجائز منافع خوروں کو قانون شکنی پر سزا بھگتنا پڑے گی۔انہوں نے کہا کہ حکومت پنجاب کی ہدایت کے مطابق عوام الناس کو مہنگائی سے ریلیف فراہم کرنے کیلئے اعلیٰ معیار کی سبزیاں اور پھل مناسب قیمتوں پر مہیا کرنے کیلئے پرائس کنٹرول مجسٹریٹس کو متحرک کیا گیا ہے جو باقاعدگی سے اشیائے خوردو نوش کی قیمتوں کو کنٹرول کر رہے ہیں۔
آج پھل، سبزی ، گوشت و اشیائے خوردونوش کی تازہ ترین ریٹ لسٹ دیکھیں
انہوں نے کہا کہ پرائس کنٹرول میکنیزم پر عملدرآمد کو ہر صورت یقینی بنایا جا رہا ہے۔ سبزیوں و پھلوں کی قیمتوں کو کنٹرول میں رکھنا ہمارے فرائض میں شامل ہے اور اس ضمن میں مصنوعی مہنگائی اور اشیاءکے ریٹس میں بلاوجہ اضافہ ہرگز برداشت نہیں کیا جائے گا۔ڈپٹی کمشنر نے کہا کہ پرائس ایکٹ کے تحت کسی کو بھی ذخیرہ اندوزی اور منافع خوری کی ہر گز اجازت نہیں دی جائے گی اور خلاف ورزی کرنے والوں کے خلاف ایف آرز اور گرفتاریاں عمل میں لائی جائیں گی۔
