وزیر اعلیٰ پنجاب کی معاون خصوصی برائے انسداد پولیو مہم عظمیٰ کاردار نے ڈپٹی کمشنر نوید احمد کے ہمراہ ڈی سی آفس گوجرانوالہ میں پریس کانفرنس کرتے ہوئے کہا کہ پنجاب میں پولیو کے خاتمے کی قومی مہم کامیابی سے جاری ہے۔ وہ مختلف اضلاع کا دورہ کر کے خود پولیو مہم کا جائزہ لے رہی ہیں
گوجرانوالہ میں 3 روز میں 953,522 بچوں کو پولیو سے بچاؤ کے قطرے پلائے جا چکے ہیں جو کہ ہدف کا 95 فیصد ہے۔ الحمدللہ پنجاب میں پولیو مہم موثر انداز میں چلائی جا رہی ہے۔ گزشتہ سال بھی پنجاب پولیو سے محفوظ رہا اور ہماری کوشش ہے کہ یہ سلسلہ جاری رہے۔
عظمیٰ کاردار نے والدین سے اپیل کی کہ وہ 5 سال سے کم عمر کے بچوں کو پولیو کے قطرے پلانے کو لازمی بنائیں تاکہ وہ عمر بھر کی معذوری سے محفوظ رہ سکیں۔ انہوں نے بتایا کہ منڈی بہاؤالدین کی پولیو سے متاثرہ بچی کی عمر 8 سال ہے، مکمل EPI ویکسین شدہ اور صحت مند ہے۔
ڈبلیو ایچ او کے تعاون سے آئندہ ماہ نومبر میں لاہور میں ایک پائلٹ پراجیکٹ شروع کیا جا رہا ہے جس کے تحت 15 سال تک کے تمام بچوں کو پولیو کے قطرے پلائے جائیں گے۔ اگر یہ منصوبہ کامیاب ہوا تو اسے دوسرے شہروں تک پھیلایا جائے گا۔ حکومت پولیو کے خاتمے کے لیے تمام ممکنہ وسائل بروئے کار لا رہی ہے جب کہ وزیر اعلیٰ کی ہدایات پر سیوریج سسٹم کی بہتری کے لیے 132 ارب کی خطیر رقم مختص کی گئی ہے۔
ڈپٹی کمشنر گوجرانوالہ نوید احمد نے بریفنگ دیتے ہوئے بتایا کہ 13 سے 16 اکتوبر تک گوجرانوالہ اور وزیر آباد میں 10 لاکھ 3 ہزار سے زائد بچوں کو پولیو کے قطرے پلانے کا ہدف مقرر کیا گیا ہے۔ 4,059 پولیو ٹیموں نے اپنے فرائض سرانجام دیئے۔
