پاکستان ریلویز ہیڈ کوارٹرز لاہور سے جاری بیان کے مطابق پاکستان ریلویز نے 11 ماہ میں 83 ارب روپے کی ریکارڈ آمدنی حاصل کی۔ مسافر ٹرینوں سے 42 ارب روپے اور مال بردار ٹرینوں سے 29 ارب روپے کمائے گئے۔
ریلوے کو دیگر ذرائع سے 12 ارب روپے کی آمدن ہوئی ہے جس کے بعد مالی سال کا 88 ارب روپے کا ریکارڈ ٹوٹنے کے امکانات بھی واضح ہو گئے ہیں۔ پاکستان ریلوے کا کہنا ہے کہ کراچی ڈویژن نے مسافر ٹرینوں سے 13 ارب روپے اور مال بردار ٹرینوں سے 25 ارب روپے کی آمدنی حاصل کی۔
اسی طرح لاہور ڈویژن نے مسافر ٹرینوں سے 10 ارب روپے اور مال بردار ٹرینوں سے 1.5 ارب روپے کمائے۔ اسی طرح راولپنڈی اور ملتان ڈویژن نے مسافروں کے شعبے سے 4،4 ارب روپے اور مجموعی طور پر 8 ارب روپے کمائے۔
وفاقی وزیر ریلوے حنیف عباسی نے کہا کہ تاریخ میں کبھی بھی مالی سال کے پہلے 11 ماہ میں اتنی بڑی آمدن نہیں ہوئی۔ گزشتہ سال اسی عرصے کے دوران ریلوے نے 77 ارب روپے ریونیو اکٹھا کیا تھا۔ حنیف عباسی نے کہا کہ محنت اور لگن سے ریلوے کو اپنے پاؤں پر کھڑا کریں گے۔
