عیدالاضحیٰ کی آمد سے قبل ہی ملک میں ایک بار پھر شدید گرمی کی لہر جاری ہے۔ میڈیا رپورٹس کے مطابق گرمی کی نئی لہر کے آغاز کے بعد سے ملک کے کئی حصوں میں درجہ حرارت 50 ڈگری سینٹی گریڈ سے تجاوز کر گیا ہے۔ لاہور سمیت پنجاب اور سندھ کے میدانی علاقے ناقابل برداشت گرمی کی لپیٹ میں ہیں۔
گرمی کی موجودہ لہر عید کے بعد تک جاری رہنے کی پیش گوئی کرتے ہوئے ماہرین موسمیات نے ملک میں پری مون سون بارشوں کے آغاز کی تاریخ بھی بتا دی۔ محکمہ موسمیات کے مطابق ملک میں 19 جون کے بعد پری مون سون بارشیں شروع ہونے کا امکان ہے۔اس سال مون سون کے موسم میں بھی معمول سے زیادہ بارشیں متوقع ہیں۔
عیدالاضحی پر میدانی علاقوں میں بارش کا کوئی امکان نہیں۔ عید کے تینوں دنوں میں ہیٹ ویو جاری رہنے کے بعد شہریوں کا دن کے اوقات میں گھروں سے باہر نکلنا انتہائی مشکل ہو جائے گا۔
ماہرین موسمیات کا کہنا ہے کہ ہمارے ملک میں سالانہ اوسطاً 188 ملی میٹر بارش ہوتی ہے جس میں سے تقریباً 141 ملی میٹر مون سون کے دوران ہوتی ہے۔ جس کی مقدار اس بار 35 فیصد زیادہ ہونے کا انکشاف ہوا ہے۔ اس کے ساتھ ہی درجہ حرارت بھی معمول سے زیادہ رہنے کا امکان ہے۔
معمول سے زیادہ درجہ حرارت کی وجہ سے گلیشیئرز کے پگھلنے کی رفتار لامحالہ تیز ہو جائے گی اور اس صورتحال میں دریا میں طغیانی کے امکان کو رد نہیں کیا جا سکتا۔ این ڈی ایم اے حکام کے مطابق اس سال معمول سے زیادہ بارشیں ہوں گی جس کے لیے مارچ سے تیاریاں شروع کر دی گئی ہیں۔
