صوبائی وزیر پرائمری اینڈ سیکنڈری ہیلتھ کیئر کے مطابق پنجاب بھر میں جعلی ادویات کے خلاف کارروائیوں کے دوران ڈرگ کنٹرول ٹیم نے منڈی بہاؤالدین میں جعلی ادویات بنانے والی فیکٹری پر چھاپہ مار کر جعلی ادویات کا سٹاک قبضے میں لے لیا۔
صوبائی وزیر صحت خواجہ عمران نذیر کا کہنا تھا کہ فیکٹری میں جعلی پیوڈین، جعلی ڈیٹول، جعلی بیٹنویٹ کریمیں بن رہی تھیں۔ ملزم مظہر کو موقع پر گرفتار کر لیا گیا۔ فیکٹری کے دو گوداموں میں بھاری سٹاک قبضے میں لے کر تین مقامات کو سیل کر دیا گیا ہے۔
منڈی بہاؤالدین کے 2 میڈیکل سٹور مالکان کے خلاف مقدمات ڈرگ کورٹ بھیجنے کا حکم
خواجہ عمران نے مزید کہا کہ صوبے بھر میں جعلی، غیر رجسٹرڈ اور بغیر لائسنس ادویات اور مصنوعات کے خلاف کریک ڈاؤن کیا جا رہا ہے۔ تمام اضلاع میں ڈرگ کنٹرول ٹیمیں تشکیل دے دی گئی ہیں۔
انہوں نے کہا کہ جعلی ادویات کے خلاف آپریشن کے لیے چیف ڈرگ کنٹرولر اظہر جمال سلیمی کی سربراہی میں ڈرگ ٹیم تشکیل دی گئی۔ ٹیم میں ڈپٹی ڈرگ کنٹرولرز بلال یاسین، حسن حیدر شاہ اور ڈرگ انسپکٹرز لئیق خان، امان اللہ اور ڈرگ کنٹرولر منڈی بہاؤالدین محمد افضل شامل تھے۔ ٹیم نے نمونے لے کر ڈی ٹی ایل کو جانچ کے لیے بھیج دیے ہیں۔
