واٹس ایپ کی جانب سے حریف ایپس سے مقابلے کیلئے تقریباً ہر ماہ ہی نئے فیچرز متعارف کرائے جاتے ہیں، کمپنی نے ایک اور دلچسپ فیچر بیٹا ورژن پر متعارف کرادیا ہے۔
واٹس ایپ اپنے صارفین کی سہولت کیلئے نت نئے فیچرز پر کام کررہا ہے، ایسا ہی ایک اور نیا فیچر بھی صارفین کو جلد دستیاب ہوگا جس کی مدد سے وہ اپنی شخصیت کو اسٹیکر میں تبدیل کرسکیں گے۔ میسجنگ ایپس کی اپ ڈیٹ پر نظر رکھنے والی ویب سائٹ (واٹس ایپ بیٹا انفو) WABetaInfo کے مطابق واٹس ایپ نے اینڈرائیڈ ڈیوائسز کیلئے اپنے بیٹا ورژن میں نیا فیچر متعارف کرادیا ہے۔
یہ بھی پڑھیں: واٹس ایپ کی صارفین کیلئے نیا فیچر لانے کی تیاری
ڈبلیو اے بیٹا انفو نے نئے فیچر کے کچھ اسکرین شاٹ بھی شیئر کئے ہیں، جن سے معلوم ہوتا ہے کہ تھری ڈی اواتار بنانے پر اسٹیکر کیسا نظر آئے گا۔
رپورٹ کے مطابق ان اسٹیکرز سے صارفین متعدد جذبات کا اظہار کرسکیں گے اور انہیں واٹس ایپ ڈسپلے پکچر یا پروفائل پکچر کے طور پر بھی استعمال کیا جاسکے گا۔ رپورٹ کے مطابق اسٹیکر کیلئے واٹس ایپ مینیو میں ایک علیحدہ سیکشن دیا جائے گا، یہ سیکشن ایموجیز، اسٹیکر اور جف آپشن کے ساتھ ہوگا۔
فی الحال نیا فیچر بیٹا ورژن میں دیا گیا ہے تاہم ابھی یہ کہنا مشکل ہے کہ عام صارفین کیلئے اسے کب تک متعارف کرایا جائے گا۔
