منڈی بہاﺅلدین( ایم.بی.ڈین نیوز 16 دسمبر 2021 )ڈپٹی کمشنر ڈاکٹر احسان الحق ضیاء نے 4 میڈیکل سٹور مالکان کے خلاف مقدمات ڈرگ کورٹ بھیجنے کا حکم دے دیا جبکہ 13 میڈیکل سٹورز کو وارننگ اور 3 کو از سر نو معائنہ کرنے کے احکامات جاری کئے گئے۔
اس امر کا فیصلہ ڈی سی آفس میں ان کی زیر صدارت ڈسٹرکٹ کوالٹی کنٹرول بورڈ کے اجلاس میں کیا گیا۔ اجلاس میں سی او ہیلتھ ڈاکٹر محمد الیاس گوندل ،ڈرگ کنٹرولر محمد افضل، ڈرگ انسپکٹر عظمیٰ مظہر وڑائچ، سیکرٹری کوالٹی کنٹرول بورڈ، ممبرز کمیٹی ڈاکٹر ارشد تنویر، ڈاکٹر کفایت رسول اور دیگر بھی موجود تھے۔
اجلاس میں ڈرگ ایکٹ کی خلاف ورزی کے مرتکب20 میڈیکل سٹورز مالکان کے کیسز پیش کئے گئے ۔ جن پر کوالیفائیڈ پرسن کی عدم موجودگی، بغیر لائسنس ، بغیر وارنٹی، زائد المیعاد، غیر رجسٹرڈ ادویات رکھنے اور ادویات کا ریکارڈ نہ رکھنے ، صفائی ستھرائی اور فریزر میں ادویات نہ رکھنے وغیرہ ایسے الزامات تھے۔ اجلاس میں تمام میڈیکل سٹورز مالکان کو اپنی صفائی پیش کرنے کا فرداً فرداً موقع دیا گیا۔
جس پر اجلاس میں بورڈ کے متفقہ فیصلے کی روشنی میں4 میڈیکل سٹورز مالکان کے مقدمات ڈرگ کورٹس بھیجنے جبکہ 13 میڈیکل سٹورز کو وارننگ اور3 کو از سر نو معائنہ کرنے کے احکامات جاری کئے گئے۔ اس موقع پرڈپٹی کمشنر احسان الحق ضیاءنے کوالٹی کنٹرول بورڈ کے ممبران کو ہدایت جاری کرتے ہوئے کہا کہ میڈیکل سٹور مالکان کو اس بات کا پابند کیا جائے کہ وہ وہ ادویات کی خریدوفروخت کا مکمل ریکارڈ اور وارنٹی ضرور رکھیں۔کسی میڈیکل سٹور پر زائد المیعاد ادویات نہیں ہونی چاہئیں۔
انہوں نے واضح کیا کہ جو میڈیکل سٹور یا کلینک کوالیفائیڈ افراد کے نام استعمال کرتے ہیں وہاں ان کی موجودگی ضروری ہے۔ کوالیفائیڈ شخص کے بغیر میڈیکل سٹور یا کلینک چلانا جرم ہے۔انہوں نے کہا کہ وارننگ یا سزا کے بعد بھی بے قاعدگیوں سے باز نہ آنے والے میڈیکل سٹوروں کا کیس پنجاب ہیلتھ کیئر کمیشن کو بھجوا کر موثر پیروی کی جائے۔ کسی تفریق کے بغیر کارروائی ہونی چاہئیے۔ احسان الحق ضیاء نے کہا کہ محکمہ صحت اور ڈرگ کنٹرولر کی ٹیمیں عطائیوں کا قلع قمع کرنے کےلئے روزانہ کی بنیاد پر میڈیکل سٹور پر ڈرگ ایکٹ کے قوانین کے مطابق معائنہ کریں اور خلاف ورزی کرنے والوں کے خلاف فوراََ کاروائی کریں۔
