منڈی بہاوالدین کا ایک اور اعزاز. منڈی بہاوالدین کے اجمل گوندل کو آڈیٹر جنرل آف پاکستان مقرر کرنیکا فیصلہ. صدرکے سمری پر دستخط ، وزیر اعظم پہلے ہی منظوری دے چکے ، اجمل ، نذر گوندل،ندیم افضل چن، ذوالفقار گوندل کے عزیز
منڈی بہاوالدین + لاہور(ذوالفقارعلی مہتو سے ) وفاقی حکومت نے منڈی بہاالدین کے گوندل خاندان کے قریبی عزیز گریڈ 22 کے افسر محمد اجمل گوندل کو آئندہ 4 سال کے لئے آڈیٹر جنرل آف پاکستان مقرر کرنے کا فیصلہ کیا ہے ۔باوثوق ذرائع نے دنیا کو بتایا ہے کہ صدر عارف علوی نے ان کی تقرری کی سمری پر دستخط کردئیے ہیں جبکہ وزیر اعظم عمران خان نے جمعرات کواحتساب کے حوالے سے اس اہم ترین عہدے پر تقرری کی منظوری دیدی تھی۔
دنیا نیوز کی تحقیقات میں یہ بات سامنے آئی ہے کہ اسی ہفتے قائم مقام آڈیٹر جنرل پاکستان مقررکئے گئے غلام محمد میمن کو ایڈہاک ازم پالیسی کے تحت کام جاری رکھنے کی تجویز بھی زیر غور آئی تھی لیکن بعد میں وزیر اعظم عمران خان اور وزیر خزانہ شوکت ترین نے آڈٹ اینڈا کاؤنٹ سروس میں گریڈ 22 کے سینئر ترین افسر اجمل گوندل کو لگانے کا فیصلہ کرلیا۔اجمل گوندل محکمانہ طور پرگریڈ 21 میں تاخیر سے ترقی کے باعث کنٹرولر جنرل اکاؤنٹس فرخ حامدی سے جونئیر تھے لیکن رولز کے تحت گریڈ 21 میں مطلوبہ مدت پوری کرنے کے بعد ان کی سنیارٹی حال ہی میں بحال ہوگئی تھی۔
حکومت کی طرف سے اجمل گوندل کی تعیناتی کے فیصلے کے بعد گریڈ 22 ہی کے افسر کنٹرولر جنرل اکاؤنٹس فرخ حامدی کے سروس کے دوران اے جی پی لگنے کے امکانات ختم ہوگئے ہیں۔ پنجاب کے ضلع منڈی بہائوالدین سے تعلق رکھنے والے اجمل گوندل پی ٹی آئی سے تعلق رکھنے والے سابق وفاقی وزیر چودھری نذر محمد گوندل،ندیم افضل چن اور پیپلز پارٹی کے سابق رکن پنجاب اسمبلی میجر ریٹائر ذوالفقارعلی گوندل کے قریبی عزیز ہیں۔
نئے آڈیٹر جنرل کے خاندانی ذرائع نے بتایا ہے کہ گزشتہ روز نذر محمد گوندل نے اجمل گوندل کو ٹیلی فون پر مبارکباد دی جس پر انہوں نے شکریہ ادا کیا۔بتایا جارہا ہے کہ صدرعلوی سے سمری کی واپسی کے بعد وزارت خزانہ نوٹیفکیشن جاری کردے گی ۔
