نیویارک: امریکا کی 30 سالہ سابق ملکہ حسن چیسلی کریسٹ نے 29 ویں منزل سے چھلانگ لگا کر اپنی زندگی کا خاتمہ کرلیا۔
عالمی خبر رساں ادارے کے مطابق 2019 میں ’’مس امریکا‘‘ بننے والی چیسلی کریسٹ نے انسٹاگرام پر ایک مختصر پوسٹ کے بعد خود کشی کرلی۔ ملکہ حسن نے رہائشی عمارت کی 29 ویں منزل سے چھلانگ لگادی۔ پولیس کا کہنا ہے کہ چیسلی کریسٹ کی موت جائے وقوعہ پر ہی ہوگئی تھی۔ ابتدائی طور پر یہ خودکشی کا کیس لگتا ہے تاہم حتمی بات پوسٹ مارٹم رپورٹ آنے کے بعد کہی جا سکتی ہے۔
قانون اور مارکیٹنگ میں اعلیٰ ڈگری رکھنے والی چیسلی کریسٹ نے خودکشی سے قبل انسٹاگرام میں ایک پوسٹ پر لکھا تھا کہ آج کا دن آپ کے لیے اچھا اور پُرسکون ہو۔ انھوں نے دل کا ایموجی بھی بنایا تھا۔ ملکہ حسن کی اچانک موت پر سب حیران رہ گئے اور ان کے مداح اب تک صدمے سے نہیں نکل پائے ہیں۔ سوشل میڈیا پر تعزیت کا تانتا بندھ گیا۔
چیسلی کریسٹ نے 2019 میں ہی مس یونیورس کے مقابلے میں حصہ لیا تھا تاہم انھیں کامیابی نہیں مل سکی تھی۔ وہ مس امریکا بننے کے بعد سے وکالت کے ساتھ ساتھ فیشن شوز اور ٹی وی پروگرامز میں حصہ لیتی رہی ہیں
