ڈپٹی کمشنرمحمد شاہد نے چلڈرن ہسپتال کا اچانک دورہ کیا ، انہوں نے ایمرجنسی وارڈز، میڈیسن سٹور، ڈسپنسری، کلینکل لیبارٹری، سٹیبلائزیشن سنٹر، ریسپیشن ، نرسری وارڈ کا معائنہ کیا ، انہوں نے سٹاک رجسٹر کو بھی چیک کیا۔ اس موقع پر انہوں نے ضروری ہدایات بھی جاری کیں۔
منڈی بہاﺅالدین( ایم.بی.ڈین نیوز 18جنوری 2022) اس موقع پر اسسٹنٹ کمشنر منڈی بہاﺅالدین کاشف جلیل ،سی او ہیلتھ ڈاکٹر محمد الیاس گوندل، ایم ایس اور دیگر بھی موجود تھے۔ کلینیکل لیبارٹری کے معائنے کے دوران انہوں نے زیادہ افراد کی موجودگی کا نوٹس لیتے ہوئے کلینیکل لیبارٹری کی رپورٹس کو دوسری جگہ سے جاری کرنے کا حکم دیا۔ انہوں نے ہدایت کی کہ کلینیکل لیبارٹری میں ٹیکنیشن کے علاوہ کسی کو بھی داخل نہ ہونے دیا جائے۔
انہوں نے ناکارہ مشینری کو کسی دوسری جگہ پر شفٹ کرنے کی بھی ہدایت کی ۔ڈپٹی کمشنر نے طبی سہولیات کی فراہمی کا جائزہ لیتے ہوئے بچوں کے والدین سے بچوں کی خیریت دریافت کیا اور پوچھا کہ آپ کو حکومت پنجاب کی طرف سے مہیا کردہ ادویات مفت اور سہولیات مل رہی ہیں۔ جس کا مثبت جواب ملنے پر انہوں نے اطمینان کا اظہار کیا۔ انہوں نے ہدایت کی کہ چھوٹے بچوں کو علاج معالجے اور ادویات کی سہولیات کی فراہمی میں کوئی کوتاہی نہیں ہونی چاہئیے۔
بعد ازاں ڈپٹی کمشنر نے پرانے ڈسٹرکٹ ہیڈکوارٹر ہسپتال کا بھی اچانک دورہ کیا ۔ انہوں نے ایمرجنسی وارڈ کا معائنہ کیا ۔ اس موقع پر انہوںنے ضروری ہدایات بھی جاری کیں ۔انہوں نے ایمرجنسی وارڈ کو رنگ و روغن کرنے، فرنیچر کو تبدیل کرنے اور ہسپتال کی چادروں کو بھی تبدیل کرنے کی ہدایت کی۔
انہوں نے کہاکہ ہسپتال کوپنجاب حکومت کی طرف سے کروڑوں روپے کے بجٹ کی فراہمی کا مقصد صحت عامہ کی بہترین سہولتوں کی فراہمی کو یقینی بنانا ہے۔صحت عامہ کی سہولتوں میں کئی گنا اضافے کے بعد سرکاری ہسپتالوں پر مریضوں کا اعتماد بڑھا ہے۔انہوں نے کہا کہ ہسپتال میں مریضوں کے لئے تمام ضروری ادویات مفت موجود ہیں۔ کسی شکایت کی صورت میں فوری ازالہ ہونا چاہیئے۔
