بغیر ریفلیکٹر روڈ پر کھڑی گنے کی ٹرالیاں ہر سال قیمتی جانیں لے جاتی ہیں۔ حادثے میں شہید ریسکیو 1122 کے اہلکار مزمل کی نماز جنازہ ادا کر دی گئی۔
منڈی بہاوالدین ( ایم.بی.ڈین نیوز 25 دسمبر 2023)ڈپٹی کمشنر شاہد عمران مارتھ اور ڈسٹرکٹ پولیس آفیسر رضا صفدر کاظمی نے ریسکیو 1122 کے شہید ڈرائیور مزمل کے نماز جنازہ میں شرکت کی۔ نماز جنازہ میں پولیس افسران اور ریسکیو 1122 کے نوجوانان نے شرکت کی۔
دھند کے باعث منڈی بہاؤالدین ریسکیو 1122 کی ایمبولینس کو حادثہ، ڈرائیور شہید
اس موقع پر ڈپٹی کمشنر شاہد عمران مارتھ اور ڈی پی او رضا صفدر کاظمی کا کہنا تھا کہ ریسکیو اہلکار کی حادثہ میں اچانک موت محکمہ اور شہید کے خاندان کے لئے بہت بڑا صدمہ ہے، جس کا ازالہ نا ممکن ہے۔ ان کا کہنا تھا کہ دوران سروس ریسکیو اہلکار کی موت کسی شہادت سے کم نہیں ہے۔ اللہ پاک شہید اہلکار کی فیملی کو یہ عظیم صدمہ برداشت کرنے کی ہمت و حوصلہ عطاء فرمائے.
یاد رہے کہ منڈی بہاوالدین قادر آباد لکھیا پل کے قریب ایمرجنسی کے دوران ریسکیو کی گاڑی دھند کے باعث سڑک پر کھڑی گنے سے لدی ٹرالی سے ٹکرا گئی تھی۔ حادثہ کے باعث ریسکیو ڈرائیور مزمل شہزاد موقع پر شہید ہوگیا تھا اور 2 ریسکیو اہلکار زخمی ہوگئے تھے۔